Llullaku: Astana duhet të fitojë nëse…

Azdren Llullaku është një prej ish-sulmuesve të Kombëtares shqiptare që ka luajtur në kampionatin kazakistans si pjesë e Astanës dhe Tobolit.

Mediat vendëse kanë folur së fundmi me 35-vjeçarin, duke qenë se Partizani luan ndaj Astanës të enjten për fazën “play off” të Ligës së Konferencës. Aktualisht Llullaku luan në Rumani si pjesë e Ceahlul Pietra Neamt.

“Astana do të ketë një ndeshje të vështirë ndaj Partizanit. Për ta do të jetë e rëndësishme të fitojnë ndeshjen në shtëpi, sepse kanë forcë dhe një numër të madh tifozësh që i mbështesin. Gjëja kryesore është të mos humbasin në Shqipëri.

Të dyja skuadrat kanë një formacion cilësor dhe trajnerë të fortë. Pres me kuriozitet të shohë idetë taktike të trajnerëve të të dyja skuadrave. Për Partizanin nuk do të jetë e lehtë të luajë në zonën e Astanës.

Megjithatë, mendoj se ndeshja e parë do të jetë shumë decizive, prandaj dhe Astana duhet të fitojë nëse kërkon kualifikimin në grupe”, ka thënë dje sulmuesi kosovar për portalin kazakistanas “Sports.kz”.

Llullaku ka luajtur për Astanën dhe Tobolin në vitin 2017, duke u aktivizuar në total 33 ndeshje, në të cilat shënoi një gol dhe u bë protagonist me 3 asistime.

Edhe pse u përfol disa herë për të luajtur në Superiore, sulmuesi nga Istogu refuzoi ofertat. Mes klubeve që ia ka biseduar kanë qenë Partizani, Flamurtari dhe Kukësi./PanoramaSport