Vijon aktiviteti i paligjshëm i lojërave të fatit në kryeqytet. Mësohet se, pesë persona janë arrestuar, ndërsa dy të tjerë janë proceduar penalisht.
Si rezultat i kontrolleve të ushtruara, shërbimet e Policisë kanë goditur gjashtë raste të aktivitetit të lojërave të fatit, në vende dhe kohë të ndryshme. Sipas policisë, në pranga kanë rënë F. K, 36 vjeç dhe J. M, 23 vjeç, pasi në rrugën “Xhanfizo Keko” në lokalin e F. K, policia arrestoi J. M, duke ushtruar aktivitetin e kundërligjshëm të lojërave të fatit nëpërmjet celularit.
Gjatë kontrollit iu gjet dhe iu sekuestrua një sasi lënde narkotike kanabis, shuma prej 99.600 lekë të rinj, të dyshuara të përfituara nga kjo veprimtari e kundërligjshme, dhe sende të tjera të kundra ligjshme;
Gjithashtu, është arrestuar B. H, 30 vjeç dhe u shpall në kërkim M. N, 29 vjeç (qiramarrësi i lokalit), pasi në një lokal në rrugën “Nikolla Tupe” ushtronte aktivitet të paligjshëm të lojërave të fatit, i cili nuk i është bindur urdhrit të punonjësve të policisë për të hapur derën. Në vijim të veprimeve, gjatë kontrollit të lokalit u gjetën e sekuestruan 11 njësi kompjuterike, 6 aparate celular, 4 tavolina pokeri, 3 valixhe me fisha (çipsa) dhe sende të tjera të kundra ligjshme;
Në pranga ka rënë dhe E. B, 26 vjeç, pasi në rrugën “Muhedin Llagami” në lokal, ushtronte aktivitetin e paligjshëm të lojërave të fatit. Në brendësi të lokalit në një tavolinë të përshtatur për lojëra me çipsa, u konstatuan disa klient.
Policia e Vlorës, arrestoi U. S, 40 vjeç, pasi u konstatua duke ushtruar aktivitetin e kundërligjshëm të lojërave të fatit nëpërmjet celularit. Në cilësinë e provës materiale u sekuestrua aparati celular dhe një shumë parash (të dyshuara të përfituara nga kjo veprimtari e kundërligjshme).
Gjithashtu, u proceduan në gjendje të lirë L. G, 46 vjeç dhe L. B, 27 vjeç, pasi në lokalit e tyre përkatëse, u konstatuan duke ushtruar aktivitetin e kundërligjshëm të lojërave të fatit nëpërmjet celularit.
Materialet hetimore i kaluan Prokurorisë pranë Gjykatës së Shkallës së Parë Tiranë, për veprime të mëtejshme.
Discussion about this post