“Do rritet apo jo rritet çmimi i energjisë për fashën 800 kw/h”? Kjo është pyetja që po i “lë pa gjumë” familjet shqiptare, të cilat çdo lloj shërbimi po e paguajnë më shtrenjtë se vendet e tjera të rajonit, pavarësisht se jemi vend prodhimi. Pas pazareve me çmimin e naftës, ku çdo ditë Bordi i Transparencës tallet me qytetarët, këtë lojë “pin-pongu” qeveria po e luan edhe me çmimin e energjisë. Në fillim të muajit shtator kryeministri Rama “urdhëroi” edhe njëherë qytetarët të kursejnë energji ose ata që shpenzojnë 800 kw/h e më shumë, do të tariforen me dyfishin e çmimit, duke u justifikuar se ky ka qenë një vit i thatë dhe çmimet janë rritur kudo. Pa kaluar shumë ditë, më 23 shtator Bordi i Entit Rregullator të Energjisë miratoi vendosjen e fashës prej 800 kilovatësh dhe çmimin e ri që do paguajnë familjet që kalojnë këtë fashë do të jetë 42 lekë kilovati pa TVSH.
Ndërkohë, me 30 shtator kryeministri Rama deklaroi në një konferencë për mediat se vendimi për rritjen e çmimit të fashës 800 kW/h do të shtyhet, pra nuk do të aplikohet për muajin tetor, pasi sasia e shirave ka qenë e kënaqshme dhe ka pasur prirje të mira në Fierzë. Por, edhe pse prurjet janë të kënaqshme, KESH po blen energji kur bursa fluron.
ERE nuk tërhiqet nga rritja e çmimeve
Por me sa duket kjo deklaratë ishte vetëm një prononcim për propagandë dhe të tregojnë se qeveria po punon për daljen nga kriza. Në fakt jo, gjithçka është fasadë. Pasi, vetëm pak orë më vonë ERE publikoi një njoftim kur thuhej se, “Çmimet e vendosura nga ERE mbeten të aplikueshme për periudhën 1 tetor deri në 31 dhjetor 2022”, duke theksuar se do të tarifohen ata që shpenzojnë mbi këtë fashë.
Ndërsa më tutje ERE shprehet se, “Në situatën e emergjencës energjetike që ndodhemi, rishikimi i çmimeve do të jetë periodik, pra nëse Furnizuesi i Shërbimit Universal do të njoftojë për kosto të ndryshuara të çmimit të blerjes së energjisë, atëherë do të reflektohen dhe nga ERE”. Me pak fjalë ERE do të veprojë si Bordi i Transparencës, sa herë të shoh “të arsyeshme” do të aplikojë tarifimin m 42 lekë për fashën 800 kilovat. Çmimet do të vendosen si të urdhërojë Rama. Konkretisht vendimi nuk ka ndryshuar, por kryeministri bën “policin e mirë”.
KESH blen energji kur rritet në bursa
Ndërkohë, vetëm për tetorin KESH ka blerë 34 milionë euro, pasi tenderi është zhvilluar në ditën më të shtrenjtë të bursës. Në dokumentin e publikuar thuhet se, 34 mln euro i ka kushtuar Korporatës Elektorenergjetike Shqiptare blerja e fundit e energjisë, që do të shërbejë për plotësimin e nevojave konsumatorë në periudhën 1-31 tetor.
Kjo është një nga 3 procedurat e vetme, që KESH ka realizuar për blerje energjie me bazë mujore, duke qenë se deri më tani blerjet janë kryer me baza ditore ose javore, duke u ndikuar drejtpërdrejt nga luhatjet e çmimeve të energjisë në bursë. Në total, KESH njofton se ka blerë 74 500 Mwh, duke siguruar të gjithë sasinë e kërkuar, teksa çmimi mesatar arrin në 455.24 euro/mwh.Sikurse, edhe në disa procedura të mëparshme, ky çmim është më i lartë se në bursë. Sipas të dhënave nga Bursa Hungareze, që shërben si referencë për Shqipërinë, më 29 shtator, kur është bërë tenderi, blerja u mbyll me një çmim mesatar prej 425.25/Mwh.
Gjithsesi, kjo ka qenë dita kur çmimi ka qenë më i larti përgjatë javës së fundit, që variuan nga 336 – 389 euro/Mwh. Vetëm për blerjet e kryera gjatë muajit shtator, KESH ka shpenzuar rreth 79 milionë euro, duke e çuar faturën totale vjetore në rreth 329 mln euro. Madje kjo vlerë është gati 10 milionë euro në raport me blerjen e fundit për muajin shtator.
Të gjitha këto të dhëna tregojnë se çmimi i energjisë elektrike do të vazhdojë të rritet për aq kohë sa qeveria importon me çmime shumë herë më të lartë se sa eksporton./ Esmeralda Hida/
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post