Ka kaluar vetëm një muaj nga dita kur KPP i anuloi dy procedura tenderues me vlerë 24 milionë lekë ARRSH-së, për ndërtimin e aksit Kardhiq- Dlevinë. Sipas kontratës fillestare ky tender duhet të kishte mbaruar prej kohësh, por nuk ka ndodhur kështu, madje dhe pjesa e tunelit që u inaugurua si e përfunduar, shfaq probleme çdo herë që bie shi. Duke marrë parasysh ankesat, problemet që po shfaq projekti, KPP rrëzoi 4 javë më parë dy procedura për ndërtimet në lotin 6 dhe kërkoi rivlerësimin e operatorëve, si dhe kujdesin me fondin limit.
Por, sikur duket, Autoriteti Rrugor Shqiptar nuk pyet për këto vendim dhe gjithmonë gjen një mënyrë se si të gllabërojë para përmes këtij projekti. Vetëm pak ditë më parë ka mbyllur garën dhe shpalli fituesin për ndërtime në aksin Kardhiq-Delvinë, konkretisht për lotin 8.
Për këtë tender, ARRSH ka ofruar 280 milionë lekë dhe ajo që bie në sy është se kompania fituese ka paraqitur ofertën me vlerë shumë të lartë, sa 96% e fondit limit. Kjo do të thotë se edhe ky tender i miratuar nuk është me procedura të rregullta, pasi ligji për prokurimet kërkon që të pranohet oferta më e përshtatshme, pra me kosto më të ulët.
Denoncim në KPP
Çdo tender për këtë aks rrugor shoqërohet me skandale. Pasi edhe këtë herë, një ditë pasi u shpall fituesi, pranë Komisionit të Prokurimit Publik ka mbërritur një ankesë. Bashkimi i shoqërive BOE “R.S. & M” SHPK & “SI.SI.-AL” SHPK përmes kësaj ankese ngrenë pretendime për mos përmbushje të kritereve nga ana e operatorit ekonomik “Jubica” SHPK dhe nga operatori ekonomik “IDK Konstruksion” SHPK, të kriterit për t’u përzgjedhur fitues.
Ata nuk janë dakord me vlerësimin e pikëve për ofertën e tyre, pasi akuzojnë ARRSH se ka përdorur skema të ndryshme për operatorë të ndryshëm, në procesin e vlerësimit.
Më tutje, në ankesë thuhet se kompania fituese Jubica” SHPK nuk ka paraqitur të gjitha dokumentet e nevojshme për të vlerësuar pikët e ofertës, por sërish i është dhënë tenderi, pa u zhvilluar një garë e mirëfilltë./ Esmeralda Hida/ Gijotina.com/
Discussion about this post