Lojërat Mesdhetare “Taranto 2026” kanë nisur zyrtarisht dhe Shqipëria po përfaqësohet në këtë event të rëndësishëm sportiv me një delegacion prej 72 sportistësh, të cilët do të garojnë në disa disiplina.
Ceremonia e hapjes u zhvillua të premten në mbrëmje, me delegacionin kuqezi që parakaloi në eventin madhor. Ndërkohë, të shtunën paradite nisën edhe garat e para, të cilat do të vijojnë gjatë pasdites.
E para shqiptare që zbriti në garë ishte notarja Arla Dermishi. Ajo konkurroi në baterinë e dytë të 50 metrave flutur, ku regjistroi kohën 28”49. Dermishi u rendit e shtata, në një bateri ku njëra prej notareve nuk mori pjesë, dhe për pasojë nuk arriti të sigurojë një vend në finalen e kësaj disipline.
Në mundje, dita nuk solli rezultate pozitive për Bajram Sinën dhe Kevin Kupin. Në peshën 60 kg të stilit greko-romak, Sina u mund 9-0 në përballjen e parë nga italiani Gabriele Puher, duke u eliminuar menjëherë nga gara.
Në peshën 77 kg, Kevin Kupi u ndal gjithashtu në sfidën e parë. Mundësi shqiptar u mposht 5-0 nga turku Junus Emre Bashar dhe nuk mundi të avancojë më tej.
Ndërkohë, Ardit Zeneli ka dhënë një tjetër sinjal pozitiv për ekipin kuqezi. Në peshën 67 kg të stilit greko-romak, ai triumfoi 11-3 ndaj italianit Jakopo Sandron në çerekfinale, duke siguruar një vend në gjysmëfinale. Në këtë fazë, Zeneli do të përballet pasditen e sotme me algjerianin Fajsal Benfrexhi.
Edhe në taekwondo pati një debutim pozitiv. Ernest Merdanaj, në kategorinë -62 kg, e nisi aventurën me fitore, duke mposhtur 2-0 libanezin Peter Zarifeh. Megjithatë, në përballjen e dytë shqiptari u mposht me të njëjtin rezultat, 2-0, nga turku Berkaj Erer, duke e mbyllur këtu garimin e tij.
Me garat që sapo kanë nisur, vëmendja e delegacionit shqiptar tashmë është te sfidat e radhës, ku synohet një paraqitje sa më dinjitoze dhe rezultate më të mira për Shqipërinë në “Taranto 2026”.
Discussion about this post