Kombëtarja shqiptare U-21 e ka nisur me një pikë aventurën në Lojërat Mesdhetare “Taranto 2026”, teksa ka barazuar 1-1 me Italinë në ndeshjen e parë të Grupit B, të zhvilluar në Leçe.
Kuqezinjtë e trajnerit Alban Bushi zhvilluan një paraqitje pozitive ndaj përfaqësueses italiane, duke kaluar të parët në avantazh dhe duke ruajtur baraspeshën deri në fund të takimit.
Shqipëria e gjeti golin në minutën e 45-të, me Rajmond Marinajn që i dha avantazhin skuadrës kuqezi në fundin e pjesës së parë. Italia reagoi pas pushimit dhe arriti të barazojë rezultatin, duke vendosur shifrat përfundimtare në 1-1.
Trajneri Alban Bushi e nisi ndeshjen me Skander Tahri në portë, ndërsa në formacionin titullar ishin Valentin Daja, Aurel Marku, Jordi Jaku, Kristi Bespallov, Nebi Qokthi, Hetem Lushaj, Rajmond Marinaj, Oresti Kasmollari, Bjorni Duka dhe Arlind Lleshi.
Gjatë pjesës së dytë, tekniku kuqezi bëri disa zëvendësime, duke aktivizuar edhe lojtarë të tjerë të grupit. Shqipëria dhe Italia patën mundësi për të ndryshuar rezultatin, por në fund të dyja skuadrat u ndanë në barazim.
Ky rezultat i jep Shqipërisë një pikë të rëndësishme në startin e “Taranto 2026”, ndërsa aventura kuqezi vijon me një tjetër përballje të rëndësishme në Grupin B.
Ndeshja e dytë e Kombëtares U-21 do të luhet më 24 gusht, ndaj Kosovës, në orën 21:00. Kuqezinjtë do të kërkojnë fitoren e parë në këtë kompeticion, për të vijuar rrugëtimin në Lojërat Mesdhetare me ambicie të plota.
Discussion about this post