Presioni në radhët e Partizani shtohet javë pas jave. Të kuqtë nuk e kanë shijuar ende fitoren e parë në kampionat pasi kanë barazuar katër herë dhe kanë humbur ndaj Teutës. Në vigjilje të derbit të kryeqytetit drejtuesit e klubit kanë menduar për të çtensionuar situatën.
Sot lojtarët e Partizanit janë argëtuar në “paintball” duke u veshur si ushtarë ndërsa nuk kanë munguar edhe të qeshurat që shihen në videon e publikuar nga drejtori sportiv Olsi Rama.
Ai pyet lojtarë si Malën, Hoxhën e Muratajn se kë dëshironin si kundërshtarë kur të ndaheshin skuadrat dhe batutat nuk kanë munguar.
Mala bëri zgjedhje të tjera para se të përmendte profesorin, Ilir Dajën, duke marrë si përgjigje nga Rama një “ti nuk qenke trim”. Atë mendim kishte edhe Albvan Hoxha, i cili shtoi edhe Ilir Bozhiqin, përgatitësin e portierëve. “Të dy Ilirët’ tha ai duke qeshur.
Ndërkohë, në momentin kur pyetet Murataj, pasi ky i fundit jep përgjigjen, Rama e thumbon. “Mendoja se mos e kishe me Beson e Ballshit”, duke iu referuar presidenti të Bylisit.
