Ditën e sotme në Itali janë shpërndarë çmimet individuale për futbollistët që kanë kontribuar më shumë gjatë sezonit 2020-2021.
Duke nisur nga porta, çmimin si gardiani më i mirë i Serisë A për sezonin që lamë pas e fitoi Xhixhi Donaruma duke mbajtur rrjetën e kuqezinjve 14 të paprekur në 38 sfida të kampionatit. Gardiani italian la pas Shjeznin e Juves i cili e fitoi vjet këtë titull dhe Handanoviç të Interit i cili nuk është se zhvilloi një sezon të mirë me zikaltrit.
Në mbrojtje, çmimin individual e fitoi futbollisti i Atalantës, Kristian Romero i cili për hire të së vërtetës zhvilloi një sezon fantastik me zikaltrit.
Në mesfushë u kurorëzua Nikolo Barela i Interit duke qenë vendimtar në shumë ndeshje për skuadrën e tij.
Çmimin për sulmuesin më të mirë e fitoi Kristiano Ronaldo, i cili fitoi dhe Këpucën e Artë këtë sezon duke realizuar 29 gola gjatë gjithë sezonit të Serisë A.
Ndërsa çmimin si futbollisti më i mirë nën 23 vjeç e fitoi sulmuesi serb i Fiorentinës, Dushan Vlahoviç. 21 vjeçari realizoi 21 gola këtë sezon në Serinë A dhe është vënë në qendër të merkatos ku disa ekipe të mëdha europiane kanë shfaqur interes të hapur për sulmuesin serb.
