Oda e Hotelerisë dhe Turizmit në Kosovë i ka bërë thirrje qeverisë që të heqë orën policore dhe masat anticovid, duke qenë se situata pandemike atje është e qetë. Me anë të një deklarate publike, OHTK i kërkon qeverise që të qëndrojë më pranë biznesit të vogël dhe t’i ndihmojë ata financiarisht, sidomos bizneset në sektorin e shërbimeve.
“Zgjatja e orarit të punës për të gjitha kategoritë deri në ora 01:00 pasmesnate; lejimi i punës për sallat e dasmave dhe klubet, sipas manualit të IKSHPK-së; të hiqet ora policore; të zgjatet afati për uljen e TVSH-së nga 18 për qind në 8 për qind, të paktën edhe për 5 vitet e ardhshme; të fillojnë organizimet e ahengjeve në bazë të manualit; të bëhet përkrahja financiare ndaj bizneseve; të bëhet subvencionimi i pagave të punëtorëve”, thuhet në reagim.
Ndër të tjera ata kërkojnë që të financohet pagesa e qirasë për periudhën 2020-2021, për ato biznese që kanë qëndruar mbyllur gjatë kësaj kohe. Ndërsa për masat kundër koronavirusit ata kërkojnë që klientëve t’u vihet si kusht paraqitja e certifikatës së vaksinimit. “Po ashtu, të mbulohen shpenzimet e qirave për bizneset nga viti 2020-2021 që kanë punuar pjesshëm; të bëhet kompensimi i bizneseve që nuk kanë punuar fare gjatë kësaj kohe; dhe për të hyrë në lokale t’u kërkohet certifikata e vaksinimit për vaksinimin e plotë ose marrjen e një doze të vaksinës kundër COVID-19, testi RT-PCR negativ për Covid-19 jo më i vjetër se 72 orë ose dëshmia se personi ka kaluar COVID-19 në të kundërtën inspektorati të merret me atë biznes”, përfundon OHTK.
Disa ditë më parë, qeveria e Kosovës vendosi lehtësimin e disa nga masat kundër COVID-19, ku ka zgjatur orarin e punës për sektorin e gastronomisë. Në vendim thuhet se sektori i gastronomisë lejohet të punojë deri në ora 23:00, kurse muzika lejohet deri në ora 21:30.
