Një bar-kafe në Firence u gjobit me 1000 euro pasi një klient u mërzit për çmimin e një filxhani kafeje.
Klienti telefonoi policinë pasi iu kërkua të paguante 2 euro për kafen që ai kishte porositur –pa kafeinë – në Ditta Artigianale, në qendër të qytetit toskan, raporton Guardian.
Klienti u ankua se çmimi nuk ishte shfaqur në menunë prapa banakut. Pikërisht ky gabim e futi në telashe lokalin, i cili shquhet për kafebërjen.
Francesco Sanapo, pronari i Ditta Artigianale, foli për gjobën në rrjetet sociale dhe mbrojti kafenë, e cila sipas tij vjen nga një plantacion i vogël në Meksikë dhe “është përgatitur me shumë kujdes”. Ai argumentoi se çmimi i kafesë ishte shfaqur në menunë dixhitale.
Në Itali, kostoja mesatare e një kafeje ekspres është 1 euro, megjithëse më shumë se 70% e bareve rritën çmimet në fillim të vitit për shkak të problemeve të zinxhirit të furnizimit dhe korrjeve të dobëta, si kudo në botë, përfshirë edhe Shqipërinë.
“Askush nuk duhet të skandalizohet më për të paguar 2 euro për një ekspres,” shtoi pronari, duke përmendur rritjen e kostos së lëndëve të para.
Discussion about this post