LSI vazhdon të nge akuza ndaj qeverisë për inceneratorin e Fierit, duke thënë se ai projekt është aferë korruptive dhe zhvillohet në shkelje flagrante të ligjit. Përmes një postimi në Facebook, nënkryetari i LSI, Petrit Vasili, ka publikuar një dokument ku tregon se në 2017 ai i ka kërkuar Drejtorisë Vendore në Fier që të zhvilloj disa konferenca në lidhje me projektin, sepse këtë gjë e kërkon vetë ligji. Por, sikur tregon Vasili, këto konferenca nuk u mblodhën asnjëherë dhe këshilli vendosi në hesap të vet nën udhëheqjen e Rilindjes.
“Komuniteti nuk u pyet, SPAK hapi sytë, paligjshmëria në Inceneratorin e Fierit ulërin.
Në 3 mars 2017, si Ministër i Drejtësisë i jam drejtuar me letër zyrtare këshilltarëve bashkiakë të Bashkisë Fier, të cilët ngrinin shqetësime të mëdha dhe përcillnin dhe njëherë edhe peticionin e 1200 banorëve të Mbrostarit, lidhur me inceneratorin e Fierit.
Organet e qeverisjes vendore ne detyrim te Nenit 16 te ligjit, janë të detyruara të garantojnë pjesëmarrjen publike në procesin e vendimmarrjes. Këto seanca janë veçanërisht të detyrueshme, sipas rasteve të parashikuara të nenit 54. Në dhunim te Ligjit të Vetëqeverisjes Vendore kurrë nuk u zhvilluan seanca të tilla për të dëgjuar Komunitetin as nga Këshilli Bashkiak dhe nga asnjë institucion tjetër. Por paligjshmëria vazhdoi të thellohet keq e me keq. Vendimi për vendosjen e Inceneratorit në Mbrostar u mor nga rilindja ne dhunim te ligjit vetëm me shumicë të thjeshtë”, shkruan ai.
Sipas Vasilit, situata rëndohet edhe më shumë kur këto shkelje të hapura mbulohen edhe nga organet e drejtësisë. Ai akuzon SPAK se, nuk ka vepruar në mbrojtje të qytetarëve dhe të drejtave të tyre, por është bërë palë me qeverinë duke mos hetuar dhe dënuar këto afera. “Me mosveprimin e tij SPAK- u po e rëndon keqas veten sepse shkelja e ligjit është kaq e thjeshtë dhe e qartë. SPAK vendosi ne krah te ligjit, te interesit publik dhe te qytetareve boll u vendose shemtueshëm vetëm në krah të qeverisë dhe të shkeljes së ligjit”, shprehet ai.
Opozita ka akuzuar vazhdimisht qeverinë për inceneratorin e Fierit, duke treguar edhe shifrat marramendëse që janë vjedhur nga taksapaguesit për këtë projekt, që në të vërtet nuk është komfort ligjit dhe nuk po iu shërben qytetarëve.
