Pas kaq kohësh heshtje Partia Socialiste për Integrim është kujtuar sot për politikë. Që nga zgjedhjet e 25 prillit, LSI ka qenë më e tërhequr nga politika, ndërsa vetë kryetarja, Monika Kryemadhi, pothuajse është “zhdukur” fare dhe nuk ka dalë me asnjë reagim ndaj qeverisë. LSI qëndroi e heshtur edhe kur u miratua qeveria e re, ndërsa sot ka dalë me një sërë akuzash ndaj kabinetit qeveritar, duke sulmuar drejtpërsëdrejti kryeministrin Rama.
Përmes një postimi në Facebook, deputetin i LSI, Petrit Vasili ka deklaruar se reforma në drejtësi është plotësisht e kapur nga qeveria. Teksa ka publikuar disa të dhëna nga studimi i Heksinkit, apo raporte nga ndërkombëtarët, Vasili shprehet se Rama bën pazare të për asgjësuar shtetin e së drejtës.
“Reforma në Drejtësi është kapur nga Rama dhe rilindja dhe këtë e di i madh dhe i vogël.Reformën në Drejtësi nuk e shpëtojnë dot në asnjë mënyrë pazaret e qelbura, por hetimi deri në fund dhe nxjerrja e ndëshkimi i përgjegjësve të kapjes së saj. Çdo pazar me Reformën në Drejtësi vetëm legjitimon kapjen përfundimtare të saj dhe asgjësimin e shtetit të së drejtës. Çdo pazar me reformën në Drejtësi është ortakëri me krimin shtetëror të Ramës dhe rilindjes”, shprehet ai.
Vasili rendit disa të dhëna, të cilat tregojnë se institucionet e drejtësisë janë gjysmë funksionale, ose veprojnë duke shkelur hapur ligjet e Kushtetutës dhe reformën në drejtësi.
“Vettingu u katandis në një Inspektorat të Deklarimit të Pasurisë dhe asgjë më shumë. Funksionoi me standarde të dyfishta dhe u kritikua hapur nga Komiteti i Helsinkit. Komisionet e vettingut kanë përbuzur jo pak herë konstatimet shumë serioze të përfaqësuesve të ONM duke shtuar edhe më shumë mosbesimin ndaj vlerësimeve të bëra. PAK dhe BKH filluan funksionimin pa numrin e ligjshëm të anëtarëve të tyre.
Gjykata Kushtetuese dhe Gjykata e Lartë janë sot pa numrin e plotë të funksionimit të tyre duke kaluar çdo afat kushtetues.
Gjatë procesit të plotësimit të Gjykatës Kushtetuese u vërtetua tentativa mafioze e kryetarit të KED, Dvoranit për të rrëmbyer anëtarët e Gjykatës Kushtetuese, që ishin kompetencë e Presidentit.
Institucionet e reja u ngritën me shkelje skandaloze të ligjit duke filluar nga KLP dhe KLGJ, ku u zgjodhën anëtarë të tyre gjithfarë personash në dhunim te hapur me ligji”, shkruan ai.
Në përfundim, Vasili shkruan se askush nuk u shmanget dot këtyre të vërtetave shumë të rënda.
E,H/gijotina.com/
