Lëvizja Socialiste për Integrim ka dalë sot në një deklaratë ku sulmon hapur Komisionin e Venecias në lidhje me raportin e saj për zgjedhjet e 30 qershor 2019. Përmes një postimi në Facebook, nënkryetari i LSI, Petrit Vasili, shkruan se Venecia përveç se bie ndesh me deklaratat e veta, del edhe kundër OSBE për të lobuar pro Ramës.
Vasili ka publikuar deklaratat e mëparshme të Komisionit dhe duke e krahasuar me deklaratën e 13 tetorit, hedh dyshimet se gjithçka po bëhet për interes të Ramës, duke mbytur kështu të vërtetën për skandalin e zgjedhjeve në 30 qershor 2019
“Venecia ka bërë opinionin e saj ndaj kërkesës së Shoqatës se Kryethatëve te Bashkive për zgjedhjet lokale moniste të 30 qershorit.
Është dukshëm një opinion i mbërthyer nga një “hall” i madh sepse opinioni i kundërvihet hapur dhe në mënyrë vetëvrasëse raportit final te ODIHR për zgjedhjet e 30 qershorit 2019 i cili thotë qartë: “Pasiguria u rrit më tej nga mosmarrëveshja midis palëve të interesuara zgjedhore në lidhje me ndarjen e përgjegjësisë midis Gjykatës Kushtetuese, si organi i vetëm i mandatuar për të vendosur mbi kushtetutshmërinë e dekreteve presidenciale, dhe Kolegjit Zgjedhor që ka mandat të mbikëqyrë ligjshmërinë e procesit zgjedhor.
Vetëm Gjykata Kushtetuese është e autorizuar të gjykojë mbi kushtetueshmërinë e dekreteve të Presidentit të Republikës.”
Por Venecia serish nën ngërçin e ” hallit” del edhe kundër vetes sepse në Opinionin Final nr. 959/2019 thotë:
“Dekreti i Presidentit nr. 11199, datë 10.6.2019 dhe Dekreti Nr. 12211, datë 27.6.2021 2019, nuk u kundërshtua siç duhet përpara ndonjë gjykate sipas procedurave kryesore (as përpara Kolegjit Zgjedhor dhe as Gjykatës Kushtetuese). Presidenti nuk kishte asnjë qëndrim dhe nuk u dëgjua në procedurat para KQZ-së dhe Kolegjit Zgjedhor. Këto organe e konsideruan Dekretin e tij të pavlefshëm, për t`u dukur i parëndësishëm”. Ndërsa ODIHR në opinionin final për zgjedhjet e 30 qershorit 2019 thotë:
“Duke iu referuar rastit të kërkesës së Partisë së Uniteti Kombëtar për t’u tërhequr nga zgjedhjet, dhe vendimeve përkatëse të Kolegjit Zgjedhor dhe KQZ, u vërejtën me shqetësim: mungesa e paanshmërisë së KQZ dhe votimi i anëtarëve të saj mbi linja partiake; fakti që gjykatësit e Kolegjit Zgjedhor janë subjekt i procesit të vetingut, që mund të ndikojë sigurinë e mandatit të tyre dhe potencialisht pavarësinë e tyre në vendimmarrje”.
Pyetja e madhe është çfarë halli apo ç’lobim e vuri Venecian në këtë pozicion vërtetë qesharak sa që e detyron ti kundërvihet ODIHR dhe vetes??”, shkruan ai.
Sipas Vasilit, është e turpshme të konsiderosh të rregullta zgjedhje që u zhvilluan pa dekretin e Presidentit të vendit.
