1 miliard lekë do të japë bashkia Përrenjas, nën drejtimin e Nuri Belbës, për transportimin e mbetjeve në metalurgjikun e Elbasanit. Sikur të mos mjaftonte që po shpenzohet kjo shumë e madhe për mbeturina, tenderi është bërë në shkelje të ligjit dhe i është dhënë një nga kompanive me më shumë skandale dhe abuzime në vend.
Bëhet fjalë për tenderin me numrin e referencës REF-19772-02-16-2022 dhe që ka si fond limit shumën prej 9,957,838 lekë të reja pa TVSH. Pikërisht nga fondi i vënë në dispozicion fillon shkelja, pasi ligji kërkon që të merren parasysh ofertat me vlerën më të ulët nga fondi limit, por Belba ka skualifikuar të gjithë operatorët e tjerë me oferta rreth 9 milionë lekë dhe ka pranuar ofertën e Luan Kaprit dhe Gëzim Salillarit “Gëzimi i Kashtës” me kompaninë “Rej shpk”, i cili ka paraqitur ofertën prej 9.5 milionë lekësh, pra 95% sa fondi limit.
Por, duke skualifikuar kompanitë e tjera pa arsye komfort ligjit dhe duke shpallur fituese kompaninë e Luan Kaprit me ofertë të shtrenjtë, Belba e ka mbyllur këtë tender pa zhvilluar një garë të mirëfilltë. Pasi në garë kanë marrë pjesë kompania “Rej Shpk” e Luan Kaprit dhe kompania “SARK shpk”. Por Bashkia Përrenjas e ka skualifikuar këtë të fundit me justifikim se nuk ka përcaktuar numrin e punonjësve dhe nuk ka dorëzuar dokumente për ekspertin që do të merret me transportimin e mbeturina. Kështu në garë ka mbetur vetë kompania e Luan Kaprit dhe 1 miliard lekë u hodhën në plehra ne shkelje të hapur të ligjit. Prandaj ky tender renditet tek kontratat me “red flag” pasi ka cenuar konkurrencën në pikën e fondit limit dhe mos zhvillimit të garës, duke krijuar mundësi për abuzime.
Raste të tjera abuzimesh
Nuk është hera e parë që kompania e Luan Kaprit merr tenderë në këtë formë. Pasi 5 muaj më parë Gijotina.com ka publikuar një tjetër rast, kur kjo kompani ka fituar tenderin për pastrimin e Pogradecit, ku bëhej fjalë për 500 mln lekë. Edhe në atë kohë kompanitë e tjera janë skualifikuar dhe Kapri ka marrë tenderin në mënyrë abuzive. Në atë kohë shkelet u evidentuan dhe nga vetë Agjencia e Prokurimit Publik e cila e anuloi këtë tender. Madje, APP thekson se gjatë këtij viti i ka kërkuar dy herë kompanisë “Rej” informacione mbi tenderin dhe dokumentacionet e aplikimit, por nuk ka marrë asnjë përgjigje, për këtë arsye kanë filluar hetimet rreth tenderit dhe vetë kompanisë.
Tjetër skandal i kësaj kompanie regjistrohet në vitin 2021. Pasi në atë kohë, ‘Rej” shpk ka përfituar në shkelje të rregulloreve edhe një tjetër tender në Lushnje, po për pastrimin e qytetit. Në mars të këtij viti, Bashkia Lushnje ka organizuar tenderin me objekt “Shërbimi i pastrimit dhe grumbullimi i mbetjeve urbane në Bashkinë Lushnje”, për të cilin është paguar 31.409.034 lekë pa TVSH. Edhe në këtë tender kompanitë me vlerën më të ulët janë skualifikuar, dhe fituese është shpallur kompania “Rej” me ofertë 27,446.311 lekë. Pra dyshja Kapri-Salillari nuk ndalen së vjedhur, sidomos në Juglindje të vendit, janë më të privilegjuarit./Gijotina.com/
Discussion about this post