Merr fund ankthi në Berlin dhe rrethinat e tij, ku kafsha që autoritetet po kërkojnë gjatë 24 orëve të fundit “nuk është një luaneshë”, por ndoshta një derr i egër, njoftoi kryebashkiaku i Kleinmachno.
“Unë supozoj se nuk ka asnjë rrezik në Berlin dhe zonën përreth,” tha Michael Grubert, kryebashkiak i qytetit në jugperëndim të Berlinit, duke njoftuar përfundimin e hetimit.
Në të njëjtën kohë ai shpjegoi se ekspertë të pavarur vlerësuan, duke përdorur një video të xhiruar gjatë natës, se “ndoshta është një derr i egër”.
Kujtohet se në operacion morën pjesë mbi 100 policë, veterinerë dhe gjuetarë, së bashku me helikopterë me kamera termike dhe një mjet të blinduar të posaçëm policie.
Menjëherë pas mesnatës së djeshme policia ka marrë denoncime nga banorë të zonës, ndërsa autoriteteve iu është dorëzuar edhe një video përkatëse. Që atëherë, policia e ka parë kafshën të paktën dy herë, por nuk ka mundur t’i afrohet, ndërsa është bërë apel që qytetarët të qëndrojnë jashtë rrugës dhe të mos i lënë kafshët shtëpiake jashtë.
Deri më tani ka mbetur e paqartë se nga ka shpëtuar katërkëmbëshi, pasi nuk është raportuar asgjë nga kopshtet zoologjike dhe cirqet që ndodhen në zonën e gjerë. Kjo ngriti shqetësimin për një luan të mundshëm të përfituar nga tregtia ilegale. Sipas Stefan Wunderlich, një përfaqësues i Këshillit Ndërkombëtar të Ruajtjes së Specieve dhe Shoqatës Gjermane të Gjuetisë, ka edhe individë privatë që zotërojnë kafshë të egra, me “tregun e zi” dhe rrjetin përkatës që janë veçanërisht aktivë në Berlinin jugor, nëpërmjet një grupi në platformën e komunikimit WhatsApp.
Discussion about this post