Analisti Fatos Lubonja, në një prononcim për Neës24 teksa ka nisur protesta kombëtare në Tiranë, është shprehur se situata aktuale kërkon reflektim nga Partia Demokratike dhe të gjithë aktorët politikë që kërkojnë largimin e qeverisë së Edi Ramës.
Sipas Lubonjës, opozita duhet të gjejë mënyrën më të mirë për të rritur pjesëmarrjen në protestë dhe për të siguruar mbështetjen më të madhe të mundshme në zgjedhjet e ardhshme, nëse kryeministri vijon të refuzojë largimin nga pushteti.
“Ky është një moment që duhet të reflektojnë të gjithë. PD-ja dhe të gjithë aktorët e tjerë politikë që kërkojnë dorëzimin e kësaj qeverie, për të gjetur zgjidhjen optimale se si të arrihet numri më i madh i njerëzve në protestë dhe si të arrihet numri më i madh i votuesve në zgjedhjet që mund të vijnë”, u shpreh Lubonja.
Analisti tha se, sipas tij, Rama ka ndërmend të qëndrojë në pushtet, duke e cilësuar këtë si një gabim si për kryeministrin dhe partinë e tij, ashtu edhe për Shqipërinë.
“Mendimi im është që ky është një moment që duhet të reflektojnë të gjithë. PD-ja dhe të gjithë aktorët e tjerë politikë që kërkojnë dorëzimin e kësaj qeverie, për të gjetur zgjidhjen optimale se si të arrihet numri më i madh i njerëzve në protestë dhe si të arrihet numri më i madh i votuesve në zgjedhjet që mund të vijnë, nëse Edi Rama do të vazhdojë të këmbëngulë duke mos u larguar, siç mendoj se ka ndërmend të bëjë gabimisht, si për të dhe për partinë e tij, ashtu edhe për Shqipërinë, duke qëndruar aty me dhunë policore.
Është me vend edhe mendimi politik, jo vetëm emocional, por edhe politik, se si duhet forcuar kjo protestë dhe masa e atyre që duan Edi Ramën jashtë politikës dhe qeverinë e tij jashtë pushtetit.
E shoh pozitive protestën që do ndodhë sot. Protesta ka pasur nevojë që të marrin pjesë grupimet shoqërore dhe politike. Kjo e bën më të lehtë atë që duam të gjithë: largimin e qeverisë me në krye Edi Ramën. Edhe anëtarë të PD-së duhet të jenë aty, sepse edhe ata janë shqiptarë. Një gjë janë mbështetësit që janë aty dhe gjë tjetër deputetët.
Kritika është se PD akuzohet me të drejtë se ka qenë pjesë e këtij sistemi kriminal, që po vazhdon në mënyrë më kriminale se më përpara dhe më absolute njëkohësisht. PD ka përgjegjësitë e saj, sepse ka bashkëpunuar me oligarkët, që Rama sot i ka me vete. Lidhjet me krimin të politikës kanë qenë dhe në kohën e Sali Berishës. PD duhet të reflektojë dhe të bëjë një ndryshim, sepse këto protesta herët a vonë do arrijnë deri në zgjedhje dhe në zgjedhje duhet një bashkim, nxjerrja e një kandidati të përbashkët“, u shpreh Lubonja.
Discussion about this post