Kryetari i Partisë Demokratike, Lulzim Basha ka publikuar një pjesë nga thirrja që bëri ditën e djeshme për qeverinë. Në një video në Facebook, kreu demokrat kërkoi që qeveria të bëjë transparencë lidhur me rezervat e shtetit në një kohë kur edhe vendi pritet që të goditet nga lufta mes Ukrainës dhe Rusisë.
Nga selia blu, Basha tha se ekonomia e vendit pritet të impaktohet negativisht nga sanksionet që vendi ynë i ka vendosur Rusisë, ndaj dhe propozon që të ulet tatimi mbi vlerën e shtuar për të gjithë produktet e shportës, dhe heqjen e taksave nga karburantet.
“Në një situatë të rritjes së pritshme të çmimeve si pasoje e agresionit rus ndaj Ukrainës, vështirësitë ku ndodhen familjet shqiptare do të thellohen edhe më shumë. Prandaj duhet që menjëherë qeveria të ketë gati një plan masash që të mundësojnë sigurimin e rezervave të mjaftueshme ushqimore, si dhe të përcaktojë mënyrat për t’u ardhur në ndihmë familjeve në nevojë. Për të kompensuar dhe lehtësuar familjet shqiptare në këto kushte, qeveria duhet të rimarrë në shqyrtim dy masa të propozuara nga Partia Demokratike:
1. Uljen e TVSH për ushqimet e shportës nga 20 në 6 % dhe
2. Heqjen e menjëhershme të taksës Rama mbi Karburantin prej 240 lekësh për litër”, shkruan Basha.
Kreu demokrat kërkoi dje nga qeveria shqiptare që të publikojë masat që ka marrë për t’i bërë ballë ndikimeve që do të ketë lufta në ekonominë e çdo familjeje shqiptare, ndërsa theksoi se ne dëmtohemi ekonomikisht shumë nga lufta në Ukrainë.
Discussion about this post