Ministrja e Jashtme Olta Xhaçka ka prezantuar sanksionet e marra nga Shqipëria për Rusinë. Ajo ka njoftuar se ka bllokuar hapësirën ajrore ndaj Rusisë e cila prej 4 ditësh ka ndërmarrë sulmin e pandalshëm ndaj Ukrainës. Ndër të tjera ministrja ka deklaruar se po punohet për të ofruar ndihma materiale ushtarake dhe spitalore për Ukrainën.
“Nga sot, hapësira ajrore e Shqipërisë mbyllet për të gjithë operatorët ajrorë rusë. Shqipëria s’merr pjesë në asnjë përballje sportive me Federatën Ruse, deri në fund të pushtimit.Po punojmë për ofrimin e ndihmave materiale ushtarake dhe spitalore për Ukrainën. Shqipëria do të vazhdojë të bashkohet me çdo nismë të aleatëve e partnerëve tanë”, ka deklaruar Ministrja e Jashtme.
Ndërkohë sanksionet e tjera të vënë nga shteti shqiptar për Rusinë prekin 654 individë dhe 42 subjekte.
“Përgjegjësia për këtë luftë është e Vladimir Putin dhe e askujt tjetër. Në këtë situatë jemi krenarë që Shqipëria po lkuan një rol mjaft të rëndësishëm, që nga OSBE e NATO, ku propozimet tona kanë qenë mjaft të guximshme. Vendi ynë propozoi një rezolutë ku i bëri thirrje Rusisë që të ndalonte sulmin ndaj Ukrainës. Shqipëria pa asnjë hezitim u është bashkuar masave dhe aktualisht po harton bazën ligjore për masat shtrënguese të miratuara nga Këshilli i BE-së që nga data 23 shkurt. Ngrirja e aseteve të Presidentit Putin, ministrave e jo vetëm, anëtarëve të Dumës Shtetërore ruse. Në total këto masa kufizuese do të zbatohet për 654 individë dhe 42 subjekte. Ndalohet dhe udhëtimi i rusëve në Shqipëri, i atyre që janë listuar në BE. Vendosen kufizime dhe në sektorin e transporteve e energjisë”, deklaron Ministrja e Jashtme.
Discussion about this post