Kryetari i Partisë Demokratike, Lulzim Basha, ka dalë pak minuta më parë në një dalje të posaçme nga selia e PD. Ashtu sikur kishte paralajmëruar Basha bëri një kërkesë të rëndësishme për qeverinë.
Ai i kërkoi nga qeveria shqiptare që të publikojë masat që ka marrë për t’i bërë ballë ndikimeve që do të ketë lufta në ekonominë e çdo familjeje shqiptare, ndërsa theksoi se ne dëmtohemi ekonomikisht shumë nga lufta në Ukrainë. Sipas tij, në këtë fazë duhen masa konkrete.
“Është e qartë për të gjithë se agresioni rus kundër Ukrainës pritet të ndikojë negativisht në ekonomi, nga çmimi i drithërave e karburanteve deri te shërbimet. Prandaj kërkoj që qeveria të bëjë transparencë për gjendjen e rezervave të shtetit, për planin e masave apo masat që ka ndërmarrë. Gjendja ekonomike e shqiptarëve është e qartë për të gjithë.
Më shumë se gjysma e shqiptarëve e kanë të vështirë të sigurojnë ushqimin për fëmijët e tyre. Prandaj është parësore dhe e menjëhershme detyra që Qeveria të ketë gati një plan masash që të sigurohet rezerva ushqimore dhe t’i gjendet pranë familjeve në nevojë. Duhet menjëherë marrja e masave konkrete edhe në drejtim të pasojave që do të vijnë nga rritja e çmimet të naftës”, tha Basha. Sipas tij, madje në 5 ditë pas luftës qeveria jonë është vonuar shumë të marrë masat e duhura, pasi ndikimi në Shqipëri është i pashmangshëm.
Discussion about this post