Zëvendësministri i Punëve të Jashtme dhe Diasporës Kreshnik Ahmeti ka zhvilluar sot një telefonatë me homologen e tij ukrainase, Emine Dzhaparova. Në këtë bisedë Ahmeti njoftoi Dzhaparovan për rreshtimin e Kosovës në përkrahje të pavarësisë, sovranitetit dhe integritetit territorial të Ukrainës.
Ai përmendi sanksionet të cilat Kosova tashmë i ka vendosur dhe gatishmërinë për t’i shtuar ato në koordinim me ShBA-të, BE-në dhe partnerët e tjerë ndërkombëtare. Gjithashtu, Ahmeti tha se e ka përmendur edhe ndihmën që Kosova po ofron në këtë situatë duke strehuar 20 gazetarë, duke larguar përkohësisht regjimin e vizave për qytetarët ukrainas dhe duke treguar gatishmëri për strehimin e 5000 refugjatëve.
Siç shkruan Ahmeti, homologia ukrainase falënderoi Kosovën për mbështetjen dhe për rreshtimin e menjëhershëm në anën e Ukrainës. Ahmeti tha se ndër të tjera, ka përcjellë ngushëllimet e Qeverisë së Kosovës për viktimat e agresionit rus dhe të dy u pajtuan që t’i vazhdojnë komunikimet e rregullta për bashkëpunim të mëtejshëm.
Discussion about this post