Në vend të pastrojë kryeqytetin dhe të vërë në punë inceneratorin, Veliaj shpenzon qindra milionë lekë për dezinfektime çdo muaj. Gijotina.com ka denoncuar më herët disa tenderë abuzivë me dezinfektantë të rrezikshëm. Veliaj vazhdon bën lekë me helmet. Me datën 9 janar 2023, krybashkiaku ka hapur një tjetër tender, me objekt “Blerje preparate për dezinfektim, dezinsektim dhe deratizim”. Bashkia Tiranë do të shpenzojë 33 332 320 lekë (të reja) për këto preparate.
Tenderi do të mbyllet me 23 janar 2023 dhe fituesi do të posedojë këtë kontratë deri në fund të vitit 2023. Rikujtojmë se tenderët e mëparshëm për këtë shërbim i ka marrë firma “Milifar”, me administrator Albert Metanin. Me këtë objekt, Veliaj hap një tender, pa mbyllur akoma kontratën e nënshkruar me “Milifar”.
Tenderi më i fundit që ka zhvilluar Bashkia Tiranë ishte në fund të muajit tetor 2022, me vlerë 30 milionë lekë të reja dhe parashikohej të zgjaste deri në tetor 2023. Logjikisht kompania fituese duhej të mbulonte pjesën e dezinfektimit dhe deratizimin e qytetit. Mirëpo Veliajt i duhen lekë para fushatës elektorale, gjen lloj lloj tenderësh, si ky i preparateve dezinfektuese, mjafton të xhiroj diku lekë nga arka e bashkisë.
Po të kishte pak nuhatje, SPAK-u do ta kishte ndjerë aromën e këtyre helmeve që vijnë era korrupsion!
Janë disa tenderë të tillë në pak kohë, që Gijotina.com i ka denoncuar: Së pari, duhet të theksojmë se këto preparate vazhdojnë të blihen të pakontrolluara dhe përbëjnë rrezik të lartë për qytetarët. Kujtojmë se, në shtator të 2022 një nga tenderët e Veliajt për dezinfektim është denoncuar pranë Komisionit të Prokurimeve Publike. Ankesa zbulon se tenderi i Bashkisë nuk përcakton detyrimin e marrjes së autorizimit nga Ministria e Shëndetësisë për këto helme të rrezikshme.
Konkretisht, ankimuesi ngre problemin kryesor se për disa nga produktet, tenderi nuk kërkon certifikim, ndërsa për disa të tjera e vendos këtë kusht. Sipas “Albania Distribution Chemicals”, mungesa e këtyre certifikatave mund të sjellë shumë mangësi apo rreziqe nga produkti. Sipas ligjit, produktet që kërkohen nga ky tender kërkojnë me patjetër që furnizuesi të jetë i pajisur me certifikatë.
Nuk kanë kaluar disa muaj nga ai denoncim dhe asnjë institucion përgjegjës nuk ka folur rreth kësaj çështje. Të paktën Ministria e Shëndetësisë duhet ta kishte dëgjuar emrin e saj që i përmendet. Kështu, edhe sot Tirana po dezinfektohet me preparate helmuese, jashtë standardeve, për llogari të korrupsionit të kryebashkiakut Veliaj!
Lexo edhe:Veliaj hap çdo muaj tenderë për dezinfektim, paguan Pëllumb Gjokën
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post