Ngjarjet e fundit që po ndodhin në qytetin e Vlorës, konfirmojnë se aty po zhvillohet një tjetër luftë brenda Partisë Socialiste. Tashmë mund të themi se frontet kanë ndryshuar, ku shënjestra nuk është më Dritan Leli, por Damian Gjiknuri.
Çfarë po ndodh në qytetin bregdetar?
Sipas burime brenda Partisë Socialiste, aty ka plasur një luftë tjetër brenda kësaj strukture. Ashtu si shpeshherë ndodh kur ka ndryshime drejtuesish, duket se emërimi në Vlorë i Ahmetajt ka krijuar një përplasje në distancë me Gjiknurin. Vendosja e Ahmetajt në Vlorë ka shkaktuar polemika, duke i detyruar socialistët të ndahen në dy grupe. I fituar në këtë mes del Kryetari i Bashkisë Dritan Leli, i cili tashmë drejton i qetë postin e tij, pas largimit të Afrim Qëndros dhe Damian Gjiknurit. Madje ai ka fituar dhe “zemrën” e Ahmetajt i cili ka nisur operacionin “fshesa” në këtë qytet.
Në mbledhjen e fundit të kryesuar nga Ahmetaj, ku merrnin pjesë drejtues të sa majtës dhe krerët e institucioneve u dha mesazhi i qartë. Të gjithë drejtorët që nuk bëjnë punën do të pushohen. Kujtojmë këtu se drejtorët janë vendosur pikërisht nga Damian Gjiknuri, duke shkaktuar kështu një luftë mes socialistëve. Ndryshimet kanë nisur duke filluar nga drejtuesit më të lartë e deri tek punëtorët e thjeshtë në administrata.
Pak kohë më parë u bë shkarkimi i kreut të ujësjellësit Shkëlqim Leskaj e në vendin e tij u emërua Elona Hodaj. Mëngjesin e kësaj të premte raportohet se janë pushuar 30 punonjës të këtij institucioni duke i nxjerrë ata në rrugë. Të gjithë punonjësit e pushuar janë vendosur aty nga Afrim Qëndro, i cili ishte mbështetës i Gjiknurit.
Shumë drejtues të tjerë nuk do të jenë më në postet e tyre, një ndryshim i tillë pritet dhe në OSHEE.
Aktualisht ky pozicion mbahet nga Erjon Osmëni, por me ardhjen e Ahmetajt ai nuk do të jetë edhe për shumë kohë në detyrë. Kujtojmë se Osmëni është emëruar me urdhër të Gjiknurit, ndaj tashmë me ardhjen e “tigrit” duhet të japë dorëheqjen. Burime brenda sallës ku u zhvillua mbledhje me delegatët e PS bëjnë me dije se ka pasur replika mes Ahmetajt dhe drejtorit të këtij institucioni. Gjatë komunikimit mes tyre, Ahmetaj e ka vënë në dijeni drejtorin se diçka nuk shkon, duke i dhënë një mesazh se ai është shënjestra e radhës.
Burime konfidenciale thonë se Osmënit i është kërkuar të japë menjëherë dorëheqjen, por ky i fundit nuk ka pranuar me arsyetimin e puna po bëhet me përpikmëri dhe ka besim të plot të Ardian Çelës. Nuk dihet nëse deri në fund do të rezistojë Osmëni apo jo, por një rast i tillë ishte dhe ai në përplasjen Rama-Leli, ku ky i fundit doli fitimtar.
Brenda Partisë Socialiste në këtë qark është kërkuar të ketë një armëpushim mes socialistëve dhe Lelit, i cili u përjashtua nga kryeministri Rama. Madje të pranishmit kanë kundërshtuar këtë kërkesë të Ahmetajt, pasi kryebashkiaku nuk është më pjesë e tyre.
Të gjitha këto veprime të Ahmetajt tregojnë se në këtë qark sundon ai e se të gjitha institucionet do të drejtohen prej tij dhe të zgjedhurve. Mesazhi është se Gjiknuri tashmë i përket të shkuarës
Discussion about this post