‘Luftë’ për 90 minuta, por Teuta dhe Skënderbeu ndajnë nga një pikë

Në kuadër të javës së nëntë të Superligës Shqiptare u luajt përballja mes Teutës dhe Skënderbeut, me të dyja skuadrat në kërkim të fitores.

Kundërshtarët erdhën në këtë përballje pas fitoreve ku të dy skuadrat janë kualifikuar në Kupën e Shqipërisë, por Teuta në Superligë po përjeton një ‘krizë’ rezultatesh.

Alfred Mensa do të befasonte portën e Teutës, ku shënon golin e tretë sezonal në minutën e 19’, duke mos i dhënë asnjë mundësi reagimi portierit Qirko me Skënderbeun që merr kontrollin e takimit.

Minuta e 36’ e takimit do të bënte që Lorenzo Vila të sjellë barazpeshën në stadiumin e Kamzës falë një goli inteligjence duke i dhënë leksione Skënderbeut të Memellit, falë asistit fantastik të Kallakut.

Teuta do të reagonte sërish me Kallakun vetem pak minuta më pas në tentativë për të thelluar avantazhin por i pamundur, me skuadrat që kthehen me rezultatin 1-1 në dhomat e zhveshjes.

Lorenzo Vila do të gjente rrjetën në minutën e 50’, por do duhej të pritej konfirmimi i sistemit VAR, sepse pozicioni i Emiljano Vilës ishte i dyshimtë në gjykimin e kryesorit të ndeshjes.

Pas konsultimit, goli i Vilës vlerësohet i rregullt, duke përmbysur në këtë mënyrë shifrat në fushë me avantazhin 2-1 në favor të Teutës.

Minutat e 70 do të krijonin tensione në fushë për një penallti të pretenduar nga ana e Skënderbeut ku kërkojnë sqarime nga arbitri Enea Jorgji. Daja pretendohet për një prekje topi me dorë, ndërsa në këtë moment ndodh edhe përplasja mes Todorovskit dhe Elvi Berishës në zonën e rreptësisë.

Pas Konsultimit me systemin VAR, trajneri Jorgji  mbyll gjithçka duke e vlerësuar si një pozicion të parregullt, duke lejuar vazhdimin e lojës.

Meilo Bajrami i sapo aktivizuar nga Skënderbeu do të rikthente barazpeshën në fushë, duke shënuar në minutën e 79’, me shifrat që tani shkojnë në 2-2.

Pas këtij barazimi të dyja skuadrat ndanë nga një pikë, me Teutën që avancon lehtshëm në renditjen e përgjithe, duke kaluar Laçin për tu pozicionuar në vendin e katërt, ndërsa Skënderbeu vazhdon të qëndorjë në zonën e kuqe të tabelës.