Duket se tenderi për kompjuterat e Institucionit të Presidentit, përveç vlerës monetare është kthyer në një çështje prestigji. Kompanitë pjesëmarrëse po kundërshtojnë ashpër shkeljet e kryera nga stafi i Presidentit Begaj gjatë procedurës së prokurimit.
Presidenti kërkon të ndërrojë laptopin personal dhe disa pajisje të tjera, për të cilat ka ndarë 24 milionë lekë. Për këtë tender, së fundmi është regjistruar denoncimi i katërt.
Konkretisht bëhet fjalë për prokurimin me objekt ‘Blerje pajisje kompjuterike’. Afati i fundit për paraqitjen e ofertave ishte më 25 mars 2024, por gara ka ngecur për shkak se më parë ishin bërë 3 denoncime në Komisionin e Prokurimeve Publike.
Denoncimi i parë ishte bërë më datë 14 mars 2024 nga firma “Blueprint Technologies”, e cila ngre dyshime se komisioni i Begajt e ka paracaktuar kompaninë fituese, pasi është kërkuar me kaq urgjencë dorëzimi i materialeve kompjuterike.
Ankimuesi thekson se afati 10 ditor për lëvrimin e kompjuterëve është i pamjaftueshëm, sepse janë pajisje që do të merren nga jashtë dhe nuk prodhohen në Shqipëri.
Ndërkohë, pa u shqyrtuar akoma ankesa e parë, më datë 18 mars 2024 janë bërë dy denoncime të tjera në KPP.
Sipas të dhënave, firmat OPTIMA COMMUNICATION dhe “QuantX IT Solutions” pretendojnë se tenderi ka një sërë kriteresh që paralizojnë operatorët për të konkurruar.
Të dyja kompanitë kanë ankesa për kriteret ku kërkohet: vërtetim të pagesës së sigurimeve për 3 punonjës, vërtetimi që këta punonjës janë të regjistruar në këtë kompani të paktën në 6 muaj e fundit. Dhe gjithashtu certifikim për IT të punonjësve, kur në fakt Presidenca në këtë tender nuk kërkon shërbim IT, por vetëm të blejë kompjuterë.
Dhe sapo Begaj ka vazhduar me procedurat duke argumentuar se ka marrë në konsideratë vërejtjet e KP nga ankesat e para, tashmë është bërë një tjetër denoncim.
Në datën 10.05.2024 pranë Komisionit të Prokurimit Publik, është administruar ankimi e operatorit ekonomik “Introvus Solutions” SHPK. Ky i fundit pretendon se është skualifikuar pa një argument ligjor. AK shprehet se e ka skualifikuar ofertën e tij pasi nuk ka paraqitur një katalog të produkteve siç kërkohej në kritere. Ndërsa ankimuesi shprehet se ka dërguar broshura, po gjithsesi nëse kishte mungesa të katalogëve, ligji e detyron AK që ta vinte ne dijeni për këtë mungesë.
Gjë të cilën Presidenca nuk e ka zbatuar dhe e ka përjashtuar nga lista ofertën e “ Introvus Solutions” SHPK. Për këtë firma në fjalë kërkon rishqyrtimin edhe njëherë të ofertave, duke ngritur pretendimin se Presidenca e ka vendosur me kohë fituesin.
Epo 4 denoncime dhe KPP lejon vazhdimin e procedurave për këtë tender?!
Për një blerje “të vogël” që bën Presidenti i Republikës dhe ka kaq shumë shkelje, imagjinojeni kur Presidenti Begaj të bëjë tendera më të mëdhenj, si për shembull të firmosë rinkstruksionin e selisë! Në fakt, Presidenti Bega ka treguar se është dorëlëshuar me firmat që hedh, sidomos gjatë kohës që ishte shef i Shtabit të Ushtrisë dhe privatët morën sipërfaqe të mëdha që ishin prona të bazave ushtarako detare.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post