Kryeministri Edi Rama iu është përgjigjur komentit të një qytetari i cili i kërkon që të ruajë Kosovën nga thundra kërcënuese e Serbisë. Rama i thotë se Kosova e ka fituar betejën me Serbinë falë aleatëve të mëdhenj e se tani duhet vetëm të ruhet nga thundra e frikës prej ballafaqimit me sfidat e paqes, duke hedhur në këtë formë ‘kunja’ për kryeministrin Albin Kurtin.
Rama shkruan ndër të tjera se kjo frikë që ka Kosova po e izolon prej vitesh dhe po e bën që të humbasë respektin ndërkombëtar që gëzonte kohë më parë.
REPLIKAT:
KOMENTUESI: Ruaje Kosovën që është tani nën thundrën kërcënuese Serbisë. Ajo është detyra jote.
RAMA: Kosova e ka fituar luften me Serbine fale aleateve tane te medhenj, tash duhet te ruhet nga thundra e frikes prej ballafaqimit me sfidat e paqes, qe prej disa vitesh po e izolon e po e ben te humbase shume prej respektit nderkombetar qe gezonte vite me pare!
Tensionet Rama-Kurti janë thelluar dhe më shumë pas përgjigjes që kryeministri i Shqipërisë dha për kritikat dhe mosbashkimit të Kosovës për nismën “Ballkani i Hapur”. Sipas Ramës, prej vitesh, liderët e Kosovës po acarojnë nervat e aleatëve strategjikë, të cilëve Serbia u duket gjithnjë e më e pafajshme, ndërsa Kosova gjithnjë e më pak e arsyeshme.
