Sulmuesi belg Romelu Lukaku zyrtarizon rikthimin e tij të radhës në Serinë A dhe këtë herë do të jetë një rival i Interit.
“Big Rom” nuk ka firmosur për Juventusin, klub që u tërhoq pas protestës së tifozëve dhe mungesës së shkëmbimit me Vlahoviç, por te Roma, e cila ka gjetur akordin me Chelsea-n për kalimin e sulmuesit në “Stadio Olimpico”.
Negociatat e dy ditëve të fundit mes dy skuadrave kanë qenë shumë pozitive dhe sot drejtuesit e klubit italian kanë qenë në Londër për të diskutuar të gjitha detajet e marrëveshjes mes palëve.
Akordi është arritur me klubin anglez për huazimin e tij për këtë sezon, nëpërmjet pagesës së 5,8 milionë eurove.
Futbollisti do të paguhet 7,5 milionë euro në sezon te klubi italian, ndërsa do të diskutohet edhe transferimi përfundimtar i tij te verdhekuqtë në vijimin e sezonit.
Sipas “La Gazzetta Dello Sport”, gjatë ditës së nesërme priten vizitat mjekësore në Itali, e më pas firma në kontratën që shënon kthimin e tij në Serinë A.
Discussion about this post