Drejtoritë e varësisë së Erion Veliajt marrin shembull nga shefi i tyre, shpenzojnë fondet për komoditetin e tyre. Kështu Inspektoratit të Mbrojtjes së Territorit do të marrë me qira 5 makina elektrike për stafin.
Në fakt përveç rasteve ku ka dhënë urdhër bashkia për prishjen e ndonjë shtëpie që të ndërtohen kulla, nuk shohim që inspektorët të dalin në terren.
Madje ata mbyllin sytë përpara ndërtimeve që bëhen nëpër lagje e në hapësira publike nga biznesmenë që janë pranë qeverisë.
Por edhe me kaq punë inspektorët duan makina elektrike, të cilat i kanë kërkuar që në korrik të këtij viti. Bëhet fjalë për tenderin me objekt “Marrje me qira e mjeteve të transportit 2024-2026”, për të cilin është vendosur në dispozicion fondi me vlerë 320 milionë lekë. Në fakt me këto shpenzime Kryeinspektori më mirë t’i kishte blerë këto makina, që të mos bëhen çdo dy vite tenderë.
Por në fakt zhvillimi i sa më shumë prokurimeve i leverdisë më shumë Kryeinspektorit. Gjithsesi le të kthehemi tek prokurimi, gara për të cilin u hap që në qershor të këtij viti dhe pritej të mbyllej në korrik.
Mirëpo më 22 korrik 2024 në Buletinin e prokurimeve është njoftuar anulimi i tenderit me arsyetimin se nuk ishte paraqitur asnjë ofertë.
Por më të nisur sezoni i ri i punës në shtator, filluan sërish “kërkesat” nga inspektorët për makina.
Kështu më 3 shtator është hapur sërish gara, me të njëjtin fond dhe afat kohor, pa asnjë ndryshim. Gara është mbyllur në tetor dhe kësaj herë kishte paraqitur ofertë vetëm firma “EUROCAR Rentals” SHPK . Nuk ka patur asnjë ofertë tjetër dhe si rrjedhojë asnjë të skualifikuar, por jemi në kushtet kur procedura duhej anuluar sërish, për mungesë konkurrence. Ligji nuk e inkurajon vazhdimin e procedurave me një ofertë të vetme, pasi nuk mund të zhvillohet një garë e mirëfilltë.
Por me sa duket Kryeinspektori e paska patur urgjente dhe më datë 5 nëntor 2024 ka lidhur kontratën me kompaninë në fjalë. Ndërkohë në kontratën përfundimtare të firmosur, fondi është rritur nga 320 milionë lekë në 370 milionë lekë, sepse përfshihet edhe TVSH.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post