Nuk përmbahet Rama, kërkon luks për vete dhe qeveritarët duke harxhuar 130 milionë lekë për servise kuzhine dhe gjeneratorë që të mos u mungojë energjia. Kështu, janë publikuar 4 tenderë në të njëjtën kohë të nga Drejtoria e Shërbimeve Qeveritare, që merret me mirëqenien e qeveritarëve në vila dhe në zyrat e tyre.
40 mln për të marrë energji
Njëri nga prokurimet, me numër reference Ref – 43547-09-27-2022 do të marrë 4,395,000 lekë të reja ose 40 milionë lekë të vjetra vetëm që t’u sigurojë ministrave pajisje që të furnizohen me energji elektrike, kur popullit t’i ndërpritet rryma. Për 10 ditë kjo drejtori do të shpenzojë 40 milionë lekë vetëm për priza, karikues, etj, ndërsa qytetarëve iu kërkohet të mos përdorin as kondicioner dhe as lavatriçe, madje edhe dush të bëjnë më rrallë.
Rreth 20 mln lekë për peshqirë, sapunë, shampo, kartopeceta për vilat
Një tender tjetër i Drejtorisë së Shërbimeve Qeveritare, që mban numër reference 43253-09-26-2022 ka për objekt “Materiale njëpërdorimëshe shërbimi dhe hotelerie”. Për këtë kontratë Drejtoria e Shërbimeve ka vënë në dispozicion fondin 1,892,913.33 lekë të reja, ose 20 milionë lekë të vjetra. Kompania që do të fitojë këtë tender do të jetë me fat, pasi do të fusë në xhep afro 20 milionë lekë vetëm për 10 ditë punë, që do të sigurojë materiale hotelerie për rehatinë e Edi Ramës dhe zyrtarëve të tij. Epo jo më kot, 4 vjet më parë qeveria ndryshoi vendimin për funksionet e Drejtorisë dhe e ktheu atë në një “agjenci udhëtimi” për Kryeministrinë dhe ministritë. Tani po kujdeset që t’u sigurojë atyre sendet “njëpërdorimshme”.
40 mln lekë për pjata dhe pirunë
Pasi iu siguroi energji dhe akomodim, Drejtoria ka hapur e një tjetër tender që të mos lërë pa pjata, pirunë e lugë ministrat tanë. Nuk iu mjafton luksi që kanë në vilat e tyre, por do të shpenzohen 40 milionë lekë për enët ku do të gatuhet për “ushtrinë” e Ramës. Edhe këto shërbime duhet të sigurohen brenda 10 ditëve, duke iu shtuar listës së abuzimit në kohë krize. Vallë deri më tani kanë pasur mungesë të këtyre sendeve dhe duhej hapur një tender, kur tryezat e qytetarëve janë bosh?!!!
30 mln shpenzime për kolltukë dhe karrige
Për të mbyllur këtë listë të gjatë shpenzimesh, Drejtoria e Shërbimeve Qeveritare ka hapur tenderin me vlerë 30 milionë lekë. Me këto para do të blihen mobilie të reja për ministrat. Sikur duket, Manastirliu, Spiropali, Çuçi, Balluku e të tjerë paskan nevojë për kolltukë të tjerë, të rehatshëm. Pastaj, mund te këtë edhe nga ato ministra që thjesht duan një tjetër arredim për zyrat e tyre. Bëhet fjalë për tenderin me numër reference Ref-43893-09-29-2022, i cili gjithashtu duhet të mbyllet me datë 13 tetor. Kështu, deri në fund të tetorit Rama dhe vartësit e tij do të jenë akomoduar mes luksit dhe shpenzimeve të larta të energjisë, ndërsa shohin se si populli varfërohet çdo ditë.
Esmerlada Hida
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post