Lule dhe qirinj, kolegët dhe shokët bëjnë homazhe për Grei Bihucin

Kolegë dhe shokë të Grei Bihucit, 19-vjeçarit që mbeti i vrarë pas një sherri në Fier një ditë më parë kanë bërë homazhe në vendin e ngjarjes.

Ata vendosën trëndafila të kuq dhe qirinj bashkë me një foto të të riut.

Të trishtuar dhe me lot në sy ata kujtuan shokun e tyre për të cilin shprehën konsideratat më të mira duke thënë se ndihen tepër të pikëlluar për humbjen e jetës bë këtë mënyrë për mikun dhe shokun e tyre.

Ata ndezën qirinj dhe i shprehën ngushëllime familjes teksa bënë thirrje që ngjarje të mos përsëriten kurrë më dhe të rinjtë duhet të vlerësojnë jetën.

Ndërkohë familja e 19- vjeçarit ka hapur dyert e mortit dhe i riu do të përcillet ditën e sotme për në banesën e fundit.

Si ndodhi krimi

Një konflikt i nisur në rrjetet sociale mes dy adoleshentëve degradoi në përdorimin e thikës. Ngjarja ndodhi rreth orës 11:30, në bulevardin “Jakov Xoxa”, ku në konflikt janë përfshirë 4 të rinj.

Dyshohet se autorët e krimit të rëndë janë dy kushërinjtë, Florjan Muka dhe Klajdi Muka (djem xhaxhallarësh).

Ata kanë goditur me thikë 19-vjeçarin, i cili humbi jetën rrugën në spital, pasi nuk arriti që t’i mbijetojë plagëve të marra dhe plagosën shokun e viktimës, 20-vjeçarin Olti Serjanaj, që hyri për të shuar konfliktin.

18-vjeçari Florjan Muka u arrestua në vendngjarje ditën e djeshme (11 mars) pas krimit të rëndë, ndërsa kushëriri i tij, Klajdi Muka, 17-vjeç u arrestua ditën e sotme.