Kryetari i PD-së, Lulzim Basha nuk i ka kursyer akuzat ndaj “rivalit” të tij Sali Berisha, ndërsa në fjalën e tij para medieve ka përmendur sërish “non gratën”, vendim i ndërkombëtarëve që i uli shumë pikë ish-kryeministrit. Sipas tij, Berisha, përveç se kërkon të rikthejë 1997, kërkon të bëjë të gjithë partinë “non grata” me lëvizjet e tij të fundit. Në fjalën e tij para medieve, Basha ndër të tjera ka theksuar se Berisha nuk ka lënë ish-kryetar pa e rrahur dhe pa i thyer dhëmbët.
“Spektakël i shëmtuar i së kaluarës që demokratët kanë vendosur ta lënë mbrapa, shkaku dihet. Dje është mbledhur këshilli kombëtar i PD-së, që ju e keni mbuluar, me standard dhe transparencë, kemi bërë përpjekje për t’u shkëputur nga e kaluara e rrahjes së sallave, që Sali Berisha nuk ka lënë ish-kryetar pa e rrahur dhe pa i thyer dhëmbët. E sotmja është ndarja nga e kaluara e errët e Sali Berishës. Farsa me gjykatën në Francë që nuk dihet kur fillon dhe mbaron”, ka thënë Basha.
Në nisje të fjalës së tij, Basha theksoi se “Berisha në kulmin e dëshpërimit që 11 Dhjetori nuk prodhoi asgjë, sot ndërmori një akt që kujtoi çdo demokrati dhe shqiptari skena të harruara nga pjesa më e errët, nga një vit dhe kohë e mbrapsht. Asnjë demokrat. As anëtarët e këshillit kombëtar, që refuzuan thirrjen për bojkot ishin këtu të pranishëm”.
Discussion about this post