Rrëzohet aksidentalisht nga ura në Devoll, 60-vjeçari gjendet i pajetë në lumë

Një 60-vjeçar nga fshati Kurilë i Devollit është gjetur i pajetë mëngjesin e sotëm në një lumë pranë zonës.

Bëhet me dije se, ai kishte shkuar për vizitë te disa të afërm në fshatin Vishocicë, ku edhe kishte kaluar mbrëmjen në një lokal të zonës.

Viktima kishte qëndruar deri në orët e vona dhe, gjatë kthimit për në banesë, dyshohet se është rrëzuar aksidentalisht teksa kalonte mbi një urë. Personat që kanë qenë me të në lokal kanë deklaruar se 60-vjeçari kishte konsumuar alkool, çka dyshohet të ketë ndikuar në humbjen e ekuilibrit.

Trupi i pajetë u gjet mëngjesin e sotëm, ndërsa në vendngjarje mbërritën forcat e policisë dhe grupi hetimor. Pas këqyrjes paraprake, policia dyshon se bëhet fjalë për një ngjarje aksidentale.

Megjithatë, do të jetë ekspertiza mjeko-ligjore ajo që do të përcaktojë shkakun e saktë të vdekjes, ndërsa hetimet për rastin vijojnë.