Dy gola të shënuar dhe një kualifikim i vendosur nga këmbët e tij. Regi Lushkja ka qenë një nga protagonistët kryesorë të ecurisë së Tiranës në Europë. Mesfushori ishte titullar edhe në sfidat ndaj Beshiktashit dhe tregoi pas ndeshjes në “Air Albania” keqardhjen që skuadra nuk ia doli të paktën të shënonte ndaj ekipit turk. Lushkja foli edhe për kampionatin dhe çfarë pret në të ardhmen në Superiore, ku sipas tij Tirana pretendon titullin kampion.
Një ndeshje e mirë në pjesën e parë, ndërsa në pjesën e dytë ndoshta vendosën diferencat në letër?
Tani ndeshja u mbyll. Besoj se kemi bërë një pjesë të parë shumë të mirë. Kemi dhënë maksimumin nga minuta e parë deri në fund. Shpresonim që të shënonim një gol. Të them të vërtetën rastet i kishim, por ndoshta fatin nuk e kishim me vete. Tej gjithçkaje, dhamë maksimumin në një ndeshje kaq të madhe. Dihet se çfarë ekipi kishim përballë dhe cili është Beshiktashi.
Në pjesën e dytë?
Mendoj se në këtë pjesë disa detaje bënë diferencën. Na ndëshkuan me një goditje standarde dhe dihet që ai është një ekip i madh dhe të ndëshkojnë.
Të shumtë janë ata që kanë aluduar se nëse Tirana nuk luante me Beshiktashin shkonte në fazën e grupeve. Jeni i këtij mendimi?
Unë besoj shumë te ky grup, pasi kemi skuadër shumë kualitative. Besoj se mund t’ia kishim dalë. E sigurt që kalonim këtë tur, por edhe në grupe, përse jo…
Një 2023 i çuditshëm për ju. Erdhët në janar te Tirana, në verë humbët vendin e titullarit, por një gol me Dinamon ju ktheu në 11-she. Çfarë keni për të thënë?
E vërtetë është kjo situatë. E nisa nga stoli ndeshjen e parë. Gjithmonë kam besuar te cilësitë e mia. U futa që në ndeshjen e parë me ndihmën dhe besimin e duhur. Kam shënuar dy gola dhe jam shumë i lumtur se si kemi ecur deri tani përballë Beshiktashit. Ndihem krenar për veten dhe djemtë.
Tani Europa iku. Ktheheni me plane të mëdha për ndeshjet në kampionat dhe Kupë?
Është një maratonë e gjatë që duhet të luhet. Do të presim nisjen e kampionatit. Normalisht objektivat tanë dihen. As nuk diskutohet që luftojmë për titullin kampion dhe Kupën e Shqipërisë. E kemi bërë gjithmonë dhe do ta bëjmë edhe këtë sezon./PanoramaSport
Discussion about this post