Deputeti i Lëvizjes Vetëvendosje ka dalë sot në një deklaratë publike sa i përket luftës Rusi-Ukrainë. Ai ka thënë se Shqipëria po jep kontributin e saj si pjesë e NATO-s, për të mbrojtur Ukrainën. Por, shtoi se Shqipëria duhet të ketë parasysh që Serbia po mbështet hapur politikat dhe regjimin e Putinit. Për këtë arsye ai i bën thirrje vendit tonë që të rrëzojë dhe pengojë përhapjen e politikave kërcënuese të Vuçiç
“Detyra që ShBA-të duket se i kanë vendosur vetes në raport me sigurinë në rajonin tonë, është që ta ndajnë sado pak regjimin e Putinit nga regjimi i Vuçiçit e Dodikut në këtë kohë lufte në Ukrainë. Për më tepër, përmes NATO-s është përforcuar rajoni me trupa shtesë, ku po kontribuon edhe Shqipëria. Këto janë pa asnjë dyshim zhvillime pozitive. Por suksesi ka qenë relativ, pasi Vuçiçi nuk e ka dënuar pushtimin e Ukrainës, nuk iu bashkua sanksioneve ndaj Rusisë, nuk e mbylli bazën ushtarake Ruse në Nish (edhe pse shpalli “neutralitet”), dhe mediat serbe të lidhura me qeverinë dhe politikanë serbë vazhdojnë të mbështesin vrullshën agresionin rus në Ukrainë.
Detyra e shqiptarëve, përveç koordinimit me NATO-n dhe BE-në në mbështetje të Ukrainës dhe në vendosjen e sanksioneve ndaj Rusisë, është demaskimi i zëshëm publik i kësaj politike oportuniste dhe kërcënuese të Vuçiçit jo vetëm për Ukrainën por edhe për rajonin e Ballkanit dhe më gjerë Evropën. Këtë demaskim janë duke e bërë tashmë publikisht disa analistë e politikanë që po kthjellohen në Evropë e në ShBA, ndërkohë që shteti shqiptar hesht dhe vazhdon Ballkanin e Hapur”, shprehet ai.
Sipas tij, detyra e shqiptarëve nuk është vetëm kontributi për ta ndarë Vuçiçin nga Rusia, por edhe nga planet e tij ekspansioniste në rajon në kurriz të shqiptarëve dhe popujve të tjerë të Ballkanit.
Discussion about this post