Gijotina.com po denoncon këto ditë abuzimet që po bëhen me fondet e shkollave nga disa kryebashkiakë. Ndërkohë që është e pashpjegueshme përse ndërhyhet tani për riparimet në godinat arsimore, kur nxënësit kanë nisur vitin shkollor. Ky mund të jetë një urdhër i ministres së re të Arsimit, Ogera Manastiliu, e cila u transferua nga Ministria e Shëndetësisë ku i plasën skandalet me vjedhjet e tenderëve dhe koncesioneve.
Këtë radhë do të ndalemi tek Bashkia Elbasan. Më datë 9 tetor 2023, kryetari Gledjan Llatja ka firmosur tenderin me objekt ‘Riparime dhe mirëmbajtje të objekteve arsimore” me një fond limit 80 milionë lekë. Punimet janë veç për suvatime e lyerje me bojë në dy apo 3 shkolla. Po të shohim grafikun e punimeve të parashikuara, shkollave në Elbasan do t’u suvatohen muret aty ky ka probleme dhe më pas do të lyhen. Nuk mjafton që janë pak lekë për rregullimin e shkollave, por shtohet këtu edhe abuzimi i Llatjas që e zhvillon tenderin me shkelje.
Edhe ky tender është zhvilluar në kundërshtim me ligjin për prokurimet dhe fondi ka përfunduar në duart e kompanisë së paracaktuar nga kryebashkiaku.
Në dokumentet e tenderit shohim që kanë marrë pjesë në garë 3 firma, ku njëra prej tyre në mënyrë fiktive. Theksojmë se njëra nga kompanitë nuk ka paraqitur ofertë, ndërsa e dyta u përjashtua shpejt e shpejt nga gara, për t’i lënë rrugën e lirë firmës BLERIMI SHPK, në pronësi të Behexhet Uruçit.
Këta e përfituan këtë tender si një dhuratë nga Llatja, i cili është një nga kryebashkiakët që abuzon më shumë me fondet e bashkisë. Kjo kontratë i shtohet listës së gjatë të tenderëve abuzivë, por Llatja duket sikur nuk ka frikë nga hetimet.
Ndërkohë, pas tre muajsh, rezultati do të jetë vetëm lyerja e mureve të disa shkollave në Elbasan, ku shumë prej tyre akoma nuk kanë kushtet bazike si ngrohje, banka të rregullta dhe ndriçimin e duhur.
Nga ana tjetër, firma BLERIMI SHPK është mësuar nga drejtorët e Ramës me fonde publike që i merr pa mundim. Shohim se kjo firmë ka marrë një numër të lartë tenderësh të dhënë nga Fondi Shqiptar i Zhvillimit, gjithmonë për riparime, arnime dhe lyerje fasadash.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post