Presidenti francez Emmanuel Macron ka sugjeruar Gjenevën si vendin e mundshëm për takimin mes presidentit rus Vladimir Putin dhe atij ukrainas Volodymyr Zelensky.
Udhëheqësi francez hodhi poshtë idenë që Parisi të organizojë një takim të tillë, ndërsa shtoi se zgjidhja është gjetja e një vendi neutra.
“Potencialisht, Zvicra, do të favorizoja Gjenevën. Ose ajo mund të jetë një vend tjetër. Herën e fundit, takimet dypalëshe u mbajtën në Turqi, në Stamboll”, kujtoi ai.
Në takimin e mbajtur në Uashington, udhëheqësit evropianë, Presidenti i SHBA-së Donald Trump dhe Zelensky diskutuan mbi mundësinë e mbajtjes së një samiti Rusi-Ukrainë, i cili mund të pasohet nga bisedime trepalëshe me Shtetet e Bashkuara dhe një takim më i gjerë shumëpalësh. Në një konferencë për shtyp mbrëmjen e djeshme, Macron tha se Turqia dhe vendet e tjera evropiane, duhet të marrin pjesë në këto bisedime.
Përpara takimit, Trump theksoi se Shtëpia e Bardhë do të priste për herë të parë një takim rekord të liderëve evropianë. Pas bisedës kokë më kokë me Zelenskyn e më pas takimit të përbashkët me udhëheqësit evropianë, Trump zhvilloi një bisedë telefonike me Presidentin rus Vladimir Putin për ta informuar mbi bisedimet.
Discussion about this post