Policia spanjolle ka zbuluar një sasi gjigante kokaine, që dyshohet se arrin në rreth 10 tonë, në dy magazina në qytetin e Aguilas, në rajonin e Murcias. Zbulimi u bë rastësisht më 30 tetor, pas një incidenti në një zonë industriale, ku një paletë me mallra ra nga një pirun ngritës. Drejtuesi i mjetit u largua me shpejtësi, duke e lënë atë me motorin ndezur pranë hyrjes së një magazine.
Pas mbërritjes në vendngjarje, efektivët e policisë nuk gjetën asnjë person, por vunë re një numër të madh kutish të vendosura mbi paleta. Dyshimet u shtuan kur një prej efektivëve vendosi të kontrollonte përmbajtjen e njërës prej tyre, duke zbuluar blloqe të presuara kokaine. Në magazinën e parë u gjetën më shumë se 5 tonë drogë, ndërsa hetimet çuan më pas edhe drejt një magazine të dytë në të njëjtën zonë, ku u zbuluan sasi të tjera të konsiderueshme.
Sipas mediave spanjolle, pas ngarkesës dyshohet se qëndron një organizatë kriminale me origjinë shqiptare. Dy ambientet mendohet se përdoreshin si pika të përkohshme magazinimi, ku kokaina mbahej përpara se të transportohej me rrugë tokësore drejt blerësve në Spanjë dhe vende të tjera europiane.
Pavarësisht përmasave të sekuestrimit, deri më tani nuk është kryer asnjë arrestim. Autoritetet spanjolle po hetojnë se kush i kishte marrë me qira magazinat, cilët persona kishin sjellë kokainën dhe kush ishte përgjegjës për ruajtjen e shpërndarjen e saj. Ndërkohë, mbetet ende e paqartë origjina e ngarkesës dhe nëse droga kishte mbërritur në Murcia përmes detit apo ishte transportuar nga një port tjetër i Spanjës.
Artikulli i plotë nga CRIME SITE
Piruni ngritës u la i braktisur
Zbulimi nisi pas një njoftimi për një aksident të mundshëm në punë në zonën industriale El Labradorcico, në veri të qytetit bregdetar Aguilas. Një punëtor kishte rrëzuar një paletë gjatë zhvendosjes së mallrave. Më pas, ai dyshohet se ishte larguar me shpejtësi, ndërsa piruni ngritës kishte mbetur me motorin ndezur, pranë hyrjes së hapur të një magazine.
Kur mbërritën efektivët e policisë lokale, nuk gjetën më askënd në vendngjarje. Megjithatë, ata vunë re paletën e rrëzuar dhe një numër të madh kutish mbi paleta të tjera. Sipas burimeve të gazetës spanjolle El Español, ambalazhet ishin mbështjellë me një material që ngjante me gomë ose neopren. Një efektiv vendosi të hapte njërën prej kutive dhe zbuloi blloqe të presuara kokaine.
Magazina e dytë
Në magazinën e parë rezultoi se ndodheshin më shumë se 5.000 kilogramë kokainë. Hetimi çoi më pas drejt një magazine të dytë në të njëjtën zonë industriale, ku u gjetën sërish sasi të mëdha droge.
Garda Civile ishte angazhuar gjatë ditëve të fundit në nxjerrjen, numërimin dhe peshimin e kokainës. Sasia përfundimtare nuk ishte ende e njohur të martën. Hetuesit llogarisin një sasi totale prej rreth 10.000 kilogramësh, ndoshta edhe më shumë. Nëse kjo sasi konfirmohet, bëhet fjalë për një nga sekuestrimet më të mëdha të kokainës në historinë e Spanjës.
Organizata shqiptare
Sipas mediave spanjolle, Garda Civile po heton përfshirjen e një organizate kriminale me origjinë shqiptare. Dy magazinat dyshohet se janë përdorur si vende të përkohshme depozitimi për sasi të mëdha kokaine, të cilat më pas do të transportoheshin me rrugë tokësore drejt blerësve në Spanjë dhe vende të tjera evropiane.
Në zhargonin e drogës në Spanjë, vende të tilla magazinimi quhen guarderias. Organizatat kriminale i përdorin ato për të mbajtur përkohësisht drogën përpara se ta shpërndajnë në transporte dhe te blerës të ndryshëm. Magazina e parë nuk kishte emër kompanie apo ndonjë shenjë tjetër identifikuese në pjesën e jashtme. Megjithatë, brenda saj ishte instaluar një sistem i mbyllur kamerash sigurie.
Hetuesit po verifikojnë se kush i kishte marrë me qira ambientet, kush e kishte sjellë drogën dhe cilët persona ishin përgjegjës për magazinimin dhe shpërndarjen e mëtejshme të saj.
Asnjë arrestim
Pavarësisht përmasave të jashtëzakonshme të sekuestrimit, sipas raportimeve më të fundit, ende nuk është arrestuar asnjë i dyshuar. Punëtorët që ndodheshin në magazinën e parë gjatë incidentit ishin larguar përpara mbërritjes së policisë.
Edhe origjina e kokainës mbetet ende e panjohur. Autoritetet nuk kanë përcaktuar nëse ngarkesa ka mbërritur në rajonin e Murcias përmes Detit Mesdhe apo është transportuar me rrugë tokësore nga një port tjetër spanjoll.
gijotina.com/
Discussion about this post