Magete nderon Partizanin në debutimin në kampionat

Partizani ka luajtur këtë mbrëmje, ndeshjen e parë në kampionatin shqiptar, për sezonin e ri.

Pas dështimit për tu kualifikuar për në fazën e grupeve të Conference League, kryeqytetasit kthyen faqe, duke triumfuar në një takim shumë të komplikuar përballë Lacit.

Të dy skuadrat, vinin në këtë ndeshje, me objektivin për të gjetur fitoren e parë në kampionat, me Partizanin që nuk kishte luajtur në javën e parë përballë Teutës, për arsye të impenjimeve europiane.

Heroi i mbrëmjes për “të kuqtë” ishte Magete, autor i një paraqitjeje të mrekullueshme, të kurorëzuar me golin e shënuar në minutat shtesë të pjesës së dytë.

Duhet thënë se në këtë takim, skuadrat shpërdoruan shumë raste, me ekipin e Zekic, që kryesisht për shkak të këtij defekti, u eliminua nga kupat europiane.

Për Lacin, vazhdon periudha negative, me skuadrën, të drejtuar tashmë nga Skerdi Bejzade, që ende mbetet me një pikë, pas dy javësh kampionat.