Parkimi mbi trotuar i makinës së Eulex-it në Kosovë,në rrugët e Prishtinës, ka shkaktuar reagime të shumta, madje video e automjetit është bërë virale në rrjetet sociale.
Hanna Kienzler, Drejtoresha e Qendrës britanike për Shoqëri dhe Shëndet Mendor ka reaguar aspak mirë në lidhje me ngjarjen në fjalë, duke e trajtuar atë politikisht. Sipas saj, parkimi i mjetit në atë mënyrë, tregon se si komuniteti ndërkombëtar e ka trajtuar Kosovën që nga lufta, “një laborator eksperimental ku bëhet çdo gjë”.
“Pse u bë bujë rreth një parkimi të gabuar të veturës së EULEX-it? Falja e EULEX-it për sjelljen nuk ka kuptim. Nuk është absolutisht sjellje individuale – situata simbolizon mënyrën se si komuniteti ndërkombëtar e ka trajtuar Kosovën që nga lufta: një laborator eksperimental ku bëhet çdo gjë”, shkruan në reagimin e saj Kienzler.
EULEX-i reagoi gjithashtu, duke thënë se e dënon fuqishëm sjelljen e personelit të tyre që e ka parkuar automjetin në atë mënyrë.
Misioni evropian për sundimin e ligjit, njoftoi se do të merren masat disiplinore për personat përgjegjës.
