Policia e Shtetit njofton se në kuadër të qarkullimit në rrugët e kryeqytetit dhe në rrugët interurbane Tiranë – Durrës – Tiranë dhe Tiranë – Elbasan – Tiranë, makina inteligjente gjatë 24 orëve të fundit ka konstatuar 523 shkelje për shpejtësi.
Sipas policisë, gjatë monitorimit në rrugët e brendshme të kryeqytetit, janë evidentuar 48 raste me shpejtësi nga 75 deri në 96 km/h, ku drejtuesve u janë pezulluar lejet e drejtimit. Gjithashtu po gjatë verifikimit rezultoi se krahas shpejtësisë, një numër i madh i drejtuesve të mjeteve kishin bërë dhe një shkelje të dytë. 206 shoferë për përdorim të celularit gjatë drejtimit të automjetit, 74 për mosvendosje të rripit të sigurimit dhe 68 për parakalime të gabuara.
Ndërkohë në të gjithë vendin janë vendosur 1089 masa administrative për shkelje që përbëjnë rrezik potencial për përfshirje në ngjarje rrugore. Nga monitorimi me radarë dhe alkooltestues janë pezulluar edhe 43 leje drejtimi për shpejtësi dhe për drejtim mjeti nën efektin e alkoolit.
