Makina Inteligjente nuk “fal” shoferët, ndëshkon 195 drejtues gjatë orëve të mbrëmjes

Gjatë mbrëmjes së sotme, Policia Rrugore ka vijuar monitorimin me makinën inteligjente, në rrugën interurbane Tiranë-Durrës-Tiranë.

Makina inteligjente ka konstatuar 195 drejtues mjetesh që qarkullonin me shpejtësi nga 126 deri në 150 km/h në kulmin e trafikut të automjeteve dhe të prezencës së lagështirës në rrugë.

Nga verifikimet ka rezultuar se 45 prej tyre janë konstatuar në shkelje të trefishtë, shpejtësi, përdorim të celularit dhe mosvendosje të rripit të sigurimit. 18 të tjerë për shpejtësi, për të cilët është vendosur edhe sanksioni plotësues pezullim i lejes së drejtimit, pasi shpejtësitë varionin nga 129 km/h deri në 150 km/h. 39 drejtues janë konstatuar me shpejtësi dhe pa vendosur rripin e sigurimit.

Monitorimet e qarkullimit rrugor vijojnë edhe në akset rrugore nacionale dhe rrugët urbane në të gjithë vendin, nga Policia Rrugore, duke përdorur radarë që punojnë edhe natën, kamera dhe makina të paloguara, me qëllim parandalimin e aksidenteve rrugore.