Makina përplaset me portat e rezidencës së kryeministrit Rishi Sunak/ Detajet

Polici të armatosur arrestuan të enjten një person pasi një makinë u fut në portat e Downing Street ku banon kryeministri i Britanisë Rishi Sunak dhe disa politikanë të tjerë të lartë.

Një burrë në vendngjarje u arrestua “me dyshimin për dëmtim kriminal dhe drejtim të rrezikshëm”, tha në një deklaratë Policia Metropolitane e Londrës. “Nuk ka raportime për të lënduar.”

Nuk dihet nëse përplasja ishte e qëllimshme dhe policia tha se po punonte për të përcaktuar rrethanat.

Sunak ishte në zyrën e tij në atë kohë, raportoi Associated Press.

Pamjet e postuara në mediat sociale treguan një makinë ngjyrë argjendi që shkonte drejt portave të Downing Street me një shpejtësi të ngadaltë nëpër Ëhitehall, rrugë kryesore në distriktin qeveritar të Londrës.

Portat e Downing Street janë të mbrojtura nga oficerë policie të armatosur dhe të paarmatosur në çdo kohë.

Pamjet e xhiruara menjëherë pas kësaj treguan makinën me bagazhin e saj të hapur kundër portave të larta metalike dhe disa oficerë policie që inspektonin automjetin, duke nxjerrë sende nga bagazhi dhe duke i futur në thasë.

Simon Parry, 44 vjeç, i tha agjencisë së lajmeve të Press Association të Britanisë se ai “dëgjoi një zhurmë dhe ngriti kokën dhe pa forca policore me armë që i bërtisnin burrit”.

Ai shtoi se “shumë automjete policie erdhën shumë shpejt për të evakuuar zonën”.

Seksione të mëdha të zonës përreth u mbyllën për publikun pasi një prani e konsiderueshme e policisë hyri në zonë.

Portat u ngritën në vitin 1989 si përgjigje ndaj kërcënimeve nga militantët e Ushtrisë Republikane Irlandeze. Në vitin 1991, IRA hodhi tre mortaja në rrugë, njëra prej të cilave shpërtheu në oborrin e shtëpisë nr. 10, ndërsa kryeministri John Major po drejtonte një mbledhje të kabinetit brenda. Tre policë dhe një nëpunës civil kanë pësuar lëndime të lehta.

Zona ishte gjithashtu në shënjestër në vitin 2017, kur një ekstremist i frymëzuar nga grupi i Shtetit Islamik vrau katër persona me një automjet në urën Ëestminster përpara se të godiste me thikë një oficer policie jashtë Parlamentit.