Një 33-vjeçar, i identifikuar si V.R ka rënë në prangat e policisë së Tiranës. I riu u kap në flagrancë duke lëvizur me 1 armë kallashnikov, krehër dhe municion luftarak. Sipas bluve, municionin luftarak i riu e kishte fshehur në bagazhin e makinës, me të cilën ai qarkullonte.
Ndërkaq e kanë pësuar dhe dy pasagjerët. Mësohet se policia ka proceduar në gjendje të lirë, shtetasit I.R 41 vjeç dhe B.Z, 33 vjeç.
“Sekuestrohen 1 armë zjarri kallashnikov, krehër dhe municion luftarak. Vihet në pranga drejtuesi i automjetit ku u gjetën arma dhe municioni luftarak, procedohen në gjendje të lirë 2 pasagjerët. Shërbimet e Forcës së Posaçme “Shqiponja”, në bashkëpunim me Komisariatin e Policisë Nr. 4, në vijim të punës për parandalimin dhe goditjen e veprimtarisë kriminale në fushën e armëmbajtjes pa leje, bazuar dhe në informacionet e siguruara në rrugë operative se në rrugën “Myslym Keta”, në një automjet, qarkullonin persona të armatosur, kanë organizuar punën dhe kanë finalizuar me sukses operacionin policor të koduar “Driver”.
Si rezultat i këtij operacioni, u arrestua në flagrancë shtetasi V. H. (R)., 33 vjeç, banues në Tiranë.
Gjithashtu, u proceduan penalisht në gjendje të lirë, shtetasit I. R., 41 vjeç dhe B. Z., 33 vjeç.
Në rrugën “Myslym Keta”, shërbimet e Policisë kanë ndaluar automjetin me drejtues shtetasin V. H. (R). dhe pasagjerë shtetasit I. R. dhe B. Z.
Gjatë kontrollit të automjetit, në bagazh, shërbimet e Policisë gjetën dhe sekuestruan, në cilësinë e provës materiale, një armë zjarri kallashnikov, krehër dhe municion luftarak.”-njoftojnë blutë e Tiranës.
Discussion about this post