Piloti holandez Maks Vershtapen nuk njeh rivalë dhe për ta bërë edhe më të qartë këtë, sot ka shkruar historinë në cirkuitin e Monzas në Itali, atë që cilësohet si “shtëpia” e Ferrarit. “Super Maks” u bë i pari i të gjitha kohëve që fiton 10 gara radhazi në një sezon të Formula 1, duke vendosur diktatin e plotë me Red Bull-in e tij.
Maks nisej pas spanjollit Carlos Sainz Jr., por priti momentin e duhur dhe në xhiron e 15 e parakaloi. Më pas, nuk kishte histori, pasi holandezi u shkëput dhe fitoi i qetë, duke lënë që lufta të bëhej pas krahëve të tij për vendet e tjera në podium.
Sainz rezistoi sa mundi, por pastaj u dorëzua para makinës tjetër Red Bull të Perez, i cili mori vendin e dytë. Spanjolli mund të ngushëllohet me faktin që ka përsëri pas Lëklerk, me të cilin zhvilloi një duel spektakolar në xhirot e fundit.
Vendi i pestë dhe i gjashtë u shkuan makinave Mercedes të Rasëll dhe Hemilton, ndërsa Albon, Norris, Alonso dhe Botas mbyllën zonën e pikëve. Nëse vazhdon kështu, Vershtapen ka për ta mbyllur shumë shpejt, historinë e këtij sezoni, duke bërë që garat e mbetura të jenë thjesht për statistika.
Discussion about this post