Mali i Zi ka regjistruar pesë raste me variantin “Omicron” të koronavirusit. Të gjithë të infektuarit mësohet se kanë simptoma të lehta. Dyshimet e para u konstatuan më 4 dhjetor në një familje në fillim të këtij muaji. Pas dyshimeve, rastet e kontaktit me këtë familje u izoluan.
Mali i Zi ka regjistruar në 24 orët e fundit 187 raste të reja me koronavirus dhe dy viktima. Në të gjithë vendin mësohet se janë 1,812 raste aktive me COVID, më së shumti në Podgoricë.
42.8 për qind e popullatës janë të vaksinuar me dozën e dytë të vaksinës ndërsa rreth 10.5 për qind e qytetarëve janë imunizuar me dozën e tretë. Ministria e Shëndetësisë paralajmëroi gjithashtu kontrolle të intensifikuara të zbatimit të masave në këtë fundjavë, veçanërisht në qendrat turistike dimërore.
Ata do të kontrollojnë posedimin e Certifikatës Kombëtare Digjitale për COVID në ambientet e hotelierisë dhe në vende të tjera ku mblidhen një numër i madh njerëzish, si dhe nëse shkelet ndalimi për organizimin e dasmave dhe festimeve të tjera private.
Discussion about this post