Ministrja e Shëndetësisë dhe Mbrojtjes Sociale, Ogerta Manastirliu, ka bërë me dije se prej ditës së sotme në çdo qendër shëndetësore do të kryhet falas edhe kontrolli i plotë mjekësor për çdo qytetar nga 35-70 vjeç për parandalimin e sëmundjeve kronike dhe monitorimin e pasojave post Covid.
“Në çdo qendër shëndetësore në vend, nga sot do të kryhet sërish kontrolli i plotë mjekësor falas për çdo qytetar 35-70 vjeç, i dobishëm për parandalimin e sëmundjeve kronike dhe monitorimin e pasojave post-Covid”, tha Manastriliu.
Në një postim në Facebook, Manastirliu përsëriti dhe njëher thirrjen se shtatori do të jetë muaj i hapur vaksinimi për të gjithë ata që nuk e kanë marrë ende vaksinën kundër Covid.
Më herët, në mbledhjen e Komitetit të Ekspertëve, zv/ministrja Mira Rakacolli u shpreh se ka vendosur vaksinimin me detyrim për tre kategoritë: stafet mjekësore, arsimtarët dhe studentët. Atyre u është lënë një afat deri në 30 shtator për t’u pajisur me pasaportën e vaksinimit.
