Pas trajnerit Jose Mourinho, radhën për të folur para mediave përpara finales së Conference League e patën lojtarët. I pari që iu përgjigj pyetjeve ishte futbollisti i mbrojtjes, Gianluca Mancini.
“Nuk duhet të brengosemi për asgjë. Nuk duhet të kemi frikë asgjë. Fejnordi ka cilësi në mesfushë dhe para. Ne do të tentojmë të bëjmë më të mirën. Shanset janë 50 me 50! E dimë se çfarë duhet të bëjmë. Ajo çfarë ka rëndësi për ne mbrojtësit është të shikojmë dhe të kujtojmë se çfarë do të bëjë kundërshtari. Duhet të jemi të qetë. Gabimet e vogla mund të bëjnë diferencën. Duhet t’i mbajmë sulmuesit e skuadrës kundërshtare sa më larg.
Ata do të jenë të fokusuar maksimalisht. Tifozët kanë qenë unik, na kanë ndihmuar që të vazhdojmë këtë udhëtim. Çfarë mund të bëjmë për ta është të japim gjithçka dhe të fitojmë. Kemi fituar në Torino, nesër në mbrëmje është finalja. Ne do të luajmë ndoshta 5 orë të tëra, do të jetë ndeshja e fundit, nuk duhet të ndjejmë lodhje.
Marash Kumbulla na ka thënë që tifozët shqiptarë do të përkrahin Romën, jemi shumë të gëzuar për këtë. Kjo është ndeshja më e rëndësishme për mua. Kam luajtur edhe me Atalantën në finalen e Kupës së Italisë, por finalet Europiane janë tjetër gjë dhe jam i lumtur për këtë finale” – tha ai.
Ndërkaq dhe Mourinho është shprehur se duhet të bëjnë të pamundurën për të shkruar historinë.
Discussion about this post