Mandarinat me pesticide/ Si gënjente AKU në dhjetor! Prokuroria thotë se u hodhën në treg

Rreth 10 ton mandarina të kontaminuara me pesticide të rrezikshme për shëndetin që ishim kthyer nga Kroacia, janë shitur në tregun tonë për konsum!

Skandali ka dalë pas një hetimit të Prokurorisë së Beratit, e cila ka zbuluar se fermeri Elton Tafa ka shitur 10 ton mandarina te Arben Dyli, administrator i një pike grumbullimi, i cili më pas i ka eksportuar drejt Kroacisë. Autoritetet kroate kanë konstatuar nivele të larta të pesticidit “Fosmet” në mandarina, një substancë e ndaluar për përdorim për shkak të rrezikshmërisë ndaj shëndetit. Si rezultat, ngarkesa u kthye në Shqipëri, por në vend që të asgjësohej sipas rregullave, Arben Dyli dyshohet se e ka rihapur në treg.

Gjithashtu prokuroria thotë: “dyshohet se shtetasi Elson Tahiraj me detyrë inspektor pranë Drejtorisë Rajonale të Veterinarisë dhe mbrojtjes së bimëve ka shpërdoruar detyrën duke lëshuar certifikata fitosanitare fiktive për subjekte të ndryshme ndër të cilat dhe subjekti i shtetasit Arben Dyli”.

Ata janë ndaluar nga policia, nën akuzat e “Shkelja e rregullave mbi lëndët helmuese”, “Prodhimi dhe shitja e ushqimeve dhe e lëndëve të tjera të rrezikshme për shëndetin ose jetën e njerëzve”, “Mashtrimi me produktet ushqimore” dhe “Shpërdorimi detyrës”, parashikuar nga nenet 281, 288, 288/c dhe 248 te K.Penal.
Ky skandal u zbulua falë kontrolleve të rrepta të autoriteteve kroate, ndërsa në Shqipëri mungesa e monitorimit efektiv mbi përdorimin e pesticideve ka bërë që të ndodhin raste të tilla. Nëse Ministria e Bujqësisë do të kishte zbatuar detyrat e saj me rigorozitet, ky problem do të ishte parandaluar në kohë, duke shmangur rrezikun për shëndetin e konsumatorëve.

AKU Gënjeu

Në fund të vitit 2024 pasi tre ngarkesa me mandarina me origjinë nga Shqipëria u kthyen mbrapsht nga Kroacia, Autoriteti Kombëtar i Ushqimit Berat në një deklaratë tha se gjobiti subjektin eksportues me pronar Arben Dyli me 4 milion lekë, pasi nuk ka njoftuar për tregtimin e agrumeve.

Madje sipas tyre, i gjithë prodhimi i kthyer mbrapsht u gropos nga specialistët e AKU-së.