Ambasadorja greke në Tiranë, Konstantina Kamitsi, u tregua e prerë lidhur me mandatin e Fredi Belerit, i cili nuk u lejua të betohet sot para Këshillit Bashkiak.
Nga Himara, ku edhe ndoqi mbledhjen e konstituimit të Këshillit Bashkiak, diplomatja greke tha se mungesa e kryetarit të zgjedhur në mënyrë demokratike, Fredi Beleri në mbledhjen e parë të këshillit bashkiak përbën goditje të madhe në shtetin e së drejtës dhe parimin themelor të prezumimit të pafajësisë.
Ajo gjithashtu paralajmëroi se nëse Beleri do të humbiste të drejtën e kryerjes së detyrës do të ishte regres i madh për një vend që do të integrohet në BE.
“Do të ishte regres i madh në fushën e shtetit të së drejtës të humbasë të drejtën e kryerjes së detyrës së tij një kryetar bashkie zgjedhur në mënyrë demokratike ndaj të cilit nuk rëndojnë akuza dhe nuk është gjykuar dhe dënuar. BE është mbi të gjitha komunitet parimesh që duhet ti zbatojë cdo vend që do të jetë anëtar i tij”, tha ajo.
Një ditë më parë ishte Ministria e Jashtme greke e cila reagoi ashpër duke e cilësuar një vendim politik atë të GJKKO që nuk lejoi Fredi Belerin të betohej para Këshillit. Sipas Athinës zyrtare, qëndrimi i mbajtur nga Gjykata shqiptare nuk ka lidhje me shtetin e së drejtës.
Discussion about this post