Komisioni i Ankesave dhe Sanksioneve vendosi që të lërë në fuqi vendimin e Komisionerit Shtetëror të Zgjedhjeve, Ilirian Celibashi, ku nuk konstatohen kushtet për shpalljen e pavlefshëm të mandatit të kryetarit të Bashkisë së Kuçovës, Kreshnik Hajdari.
Pas shqyrtimit të ankimimit nga subjekti politik Partia e Lirisë dhe ish kandidati për kryetar i bashkisë Kuçovë, Lefter Maliqit, KAS njoftoi se “me shumicë votash vendosi rrëzimin” e këryre ankesave dhe “lënien në fuqi të vendimit të datës 1 korrik të vitit 2026” të marrë nga Celibashi.
Maliqi inicoi një betejë të gjatë ligjore duke kërkuar pavlefshmërinë e mandatit të Hajdarit në bazë të ligjit të dekriminalizimit, me pretendimin se ai kishte fshehur në formularin e vetëdeklarimit një dënim të mëparshëm në shtetin grek.
Prokuroria e Përgjithshme gjeti se ky pretendim ishte I saktë dhe se Hajdari ishte dënuar me 4 muaj burg të konvertuar me gjobë në Greqi për hyrje të paligjshme në territorin grek në vitin 1999, dënim që nuk e kishte deklaruar në formular.
Por pavarësisht kësaj gjetje, në një vendim të prillit 2023, KQZ konstatoi se kryebashkiaku socialist nuk ishte në kushtet për të humbur mandatin pasi vepra penale të cilën ai nuk kishte deklaruar nuk përfshihej në veprat penale që mund ta çonte në kushtet e ndalimit për të ushtruar detyrë publike, sipas dispozitave të ligjit të dekriminalizimit.
Ndërkohë SPAK e akuzoi Hajdarin për falsifikim dhe ai u dënua me vendim të formës së prerë në korrik të 2024 me 6 muaj burgim për falsifikimin e formularit të dekriminalizimit, i konvertuar në shërbim prove.
Maliqi e riktheu çështjen në KQZ duke kërkuar ndryshimin e vendimit të mëparshëm të Komisionerit dhe konstatimin e deklarimit të tij si të rremë dhe për pasojë shpalljen të pavlefshëm dhe ndërprerjen e mandatit si kryebashkiak.
Discussion about this post