Mandati i Olta Xhaçkës, PD kërkon mbledhjen e KL-së

Grupi Parlamentar i PD nuk humbet kohë, duke i bërë kërkesë kuvendit që të mblidhet Këshilli i Legjislacionit për zbatimin e vendimit të gjykatës kushtetuese për mandatin e Olta Xhaçkës

Gjykata Kushtetuese shpalli dje vendimin e saj për mandatin e Olta Xhaçkës, duke rrëzuar Kuvendin dhe duke i dhënë të drejtë Grupit Parlamentar të Partisë Demokratike. Opozita i është drejtuar sot Kuvendit me kërkesën për mbledhjen urgjente të Këshillit të Legjislacionit dhe përfshirjen në rend dite të seancës së ardhshme të mocionit për dërgimin e mandatit të Olta Xhackës në Gjykatën Kushtetuese.

Deputetët anëtarë të Këshillit të Legjislacionit Enkelejd Alibeaj, Gazment Bardhi, Dhurata Cupi, Saimir Korreshi dhe Greta Bardeli kërkojnë nga Kryetarja e Kuvendit thirrjen e mbledhjes së Këshillit të Legjislacionit të hënën në orën 12:00 dhe përfshirjen e kësaj çështje në seancën plenare të datës 2 Mars.